MNF sorkar hnuaiah Mizoram Healthcare Scheme a hlawhchham chiang hle nia sawiin Congress party chuan, an sorkar a nih chuan mipuiten an dam loh nikhuaa a thlawna inenkawlna turin Rs nuai 15 thleng ruahman a nih thu an sawi.
Thawhtanni khan Aizawl Press Club-ah MPCC Media dept-in thu thar thehdarhtute an kawm a. Media dept member Lalremruata chuan Covid-19-in khawvel pum a nuai hnuah Mizoram sorkar sum dinhmun a lo derthawng hle tih hriat a ni a. Hei hi a chhan ber chu healthcare system thuam that aia project hmantlak leh chhawrtlak mang loha mipui sum tam tak MNF sorkarin a khawh ral vang niin a sawi.
Lalremruata chuan Mizoram chu cancer natna vei an tam avangin ‘Cancer State’ tia koh hial niin, kum tin mi za chuang fe cancer natna avangin nunna an chân chung hian kum nga chhunga MNF sorkarin an bengkhawn mumal duh miah lo tih sawiin, “Inthlan dawnah mipui bum nan cancer research centre siam turin lungphum a phum tha ve leh hnuhnawh a ni,” a ti.
MNF-in chhungkaw tin tan Mizoram State Health Care Scheme (MSHCS) hnuaiah health insuarance nuai hnih a tiam chu a hlawhchham chiang hle tih sawiin Lalremruata chuan, “Kum 2023-24 budget-ah health sector atan Rs vaibelchhe 751 chu khawiah nge a awm pawh kan hre tawh lo a. Heti chung hian mipuiin sum an hmuh let tur (reimbursement) an hmuh let loh sorkarin a batsak zat hi Rs vaibelchhe 63.88 lai a ni,” a ti bawk.
MNF sorkarin kum 2021-2023 chhunga mipui atanga Health Care Premium an dawn Rs vbc 15 chu thawktute hlawh atan an hmang vek a. Thingtlangah nasa lehzualin sorkar enkawl public health sector a tlabal lehzual a. Natna awlsam têa enkawl mai theih tur pawh harsa chung chungin Aizawl an pan a tul niin a sawi a. He state pachhia, kil tina leibain a um mek hian sum leh pai (funding) hi National Health Mission (NHM)-ah hian a innghat hlawm tawp niin a sawi.
MPCC Media dept member hian naupang hriselna lam pawh MNF sorkarin an ngaihthah hle a, taksa mamawh khawp chaw tha hmuh loh avanga naupang thanthu (stunting) zat hi kum nga hnuai lamah zaah 28.9 lai niin, hmarchhak state zingah Mizoram hi a sang ber pawl a nih thu a sawi a. Naupang chaw tha hmu lo leh thanthu tihrema puihna tur central atanga fund hmuh zinga hman tak tak chu zaah 67 chauh a nih thu a sawi bawk.
Congress party-in sorkarna an chang a nih chuan mipuiten an dam loh nikhuaa a thlawna inenkawlna turin chhungkaw tin tan Rs nuai 15 thleng ruahman a nih thu sawiin, “Rajasthan-a Congress sorkarin heihi a hlawhtlinpui mek a, Mizoramah pawh hlawhtlinpui ve ngei kan tum a ni,” a ti a ni.