Election Commission of India chuan Pathianni khan Maharashtra, West Bengal leh Kerala-a Rajya Sabha bial khat theuh ruak hnawh khatna tura bye-election chu November 29-ah neih a ni dawn tih a puang.
Kerala leh West Bengal-a bialte hi a vawngtu MP, Jose K Mani leh Arpita Ghosh te an bân avanga ruak ta a ni.
Maharashtra-a bial khat ruak ve thung erawh hi chu MLC atanga thlan tlin, Sharad Namdeo Ranpise-a a thih avanga ruak a ni ve thung.
EC-in ram rorelna in sang zawka thu tur thlan tur chungchanga thuchhuah a siamah hian a chuh tumte tan November 16 thleng hming pek luh theih a nih dawn thu leh November 29 tlai dar 5:00-ah vote tlate chhiar nghal tur a nih thu a tar lang.
India-a ram rorelna in sang zawkah hian member 250 an awm thei a, tunah hian 243 awm mekin heng zinga 233 hi state leh union territory hrang hrang aiawh tura thlan chhuahte an ni.
Member 250 awm thei zinga 238 hi thlan chhuah an ni a, mi dang 12 erawh president-in thu tura ngaih chin a ruat an ni a. Heng mite hi art, literature, science leh vantlang tana hnathawk thate an ni tlangpui thin.