Aizawl : Thenzawl-a damdawi in pahnih, Thenzawl Community Health Centre leh Integrated Ayush Hospital-ah bekang eisual vanga damlo enkawl mi 17 an awm mek.
Thenzawla Vantawng Editor Liantluanga Renthlei hnen atanga thudawn danin, Inrinni kalta khan bekang eisualtute hian Thenzawl bazar-a Kanghmun South khua atanga an zawrh, an lei nia hriat a ni a. Bekang an ei hnu hian an an nuamsam lo zui nghal a, Pathianni tlai atang khan bekang eisual te hi Integrated Ayush Hospital, Thenzawl-ah admit an ni.
Thawhtanni zan thleng khan bekang eisual te hi admit an la awm a, Ayush Hospital ah hian mi 11 inentir zingah he chanchin buatsaih lai thleng hian mi pakua enkawl mek an ni.
Thawhtanni atang khan Thenzawl CHC ah hian bekang eisual inentir an awm tan a, nizan thleng khan mi 15 an inentir tawh a. An zinga mi pasarihte chu damdawi pek niin, mi palite admit an ni a, tunah hian an dinhmun enthlak mi pali an awm mek bawk.
Bekang um eisual vanga Thenzawl damdawi in pahniha inentir zawng zawng hi he chanchin buatsaih lai thleng hian mi 26 awm tawhin, mi 17 chu damdawi inah enkawl mek an ni. Bekang um eisualtute hi an kua a tha lo nasa hle a, khawsik leh luak ten a thawk bawk.