- Dr. C. Lalrampana
A KAMKEUNA
Lirthei emaw, lawng emaw, thlawhtheihna, mihring leh ransa emaw, ranvulh emaw pawh ni se, fanghmir thleng pawhin kawng mumal bik tak kan nei theuh a, kan kalkawng daltu leh tibahlahtu a awm chuan tluang taka kal a harsain kan tum ram thlen a harsa thin. Kawng min te, kawng chhia te, thing tlu leh thil dang dang vanga kal theih loha a awm chuan hringnun a khaihlak nasa thei hle thin. Chuvangin, kawngdaltu apiang chu thenfai zung zung a ngai thin.
8th Mzoram State Assembly inthlan dawn leh sorkar thar a pian hlim kum 2019 khan tuna kan CM zahawm tak hian traffic jam awm lohna khawpui (traffic jam free city) ni turin zåwl khawpui hi siam an tum ni khan sawi a awm a. Mahse, kum 5 term ral hnu thleng pawhin Zãwl khawpuiah traffic jam chuan zual lam a la pan zel zawk niin a lang.
LIRTHEI TAM VANG EM NI?
Tun hma deuha Mizoram atanga USA tlawhtute sawi uar leh titi tam ber chu “USA-ah chuan mimal tinin motor an nei vek a, an khalh thiam vek bawk” tih hi a ni a; a nawm hmel kan ti thei rap mawle! Mahse, USA leh ram dangte anga hmun hma nei tha ve lo tan chuan lirthei ngah hi a chakawm lem loh hle a; phurrit thlentu a ni zawk hlauh thei a ni. New Delhi khawpuia kawngpuite khu a zãu tha hle a, vawi khatah lirthei 4-8 tlan rual theihna khawpui niin zana lirthei tlan han hmuh phei chuan.dumde Inkhãwmpui hmang zo hlim ni ãwm takin an de chuah chuah a, a tlehin an tleh dul dul thei a; hengte nena khai khin phei chuan Aizawl khawpuia lirthei tam dan nen chuan tehkhin phak rual a ni lo. Lirthei a tam tehlul nen traffic jam awm ve tho mah se, Zãwl khawpui ang em em hi chuan a buai ve nuai nuai lem lo, a chhan ber chu traffic management a that em vang a ni. Mizoram Transport Department-in Mizoram puma lirthei awm zat August 31, 2023 thlenga a chhin chhiah (registered) danin lirthei 294,395 (Nuai hnih singkua sangli zathum sawmkua panga) a awm mek a. New Delhi & USA angin lirthei tam ve phei se chuan tuna Mizorama mihring awm zat lirthei nuai 12 leh sing 6 vel a awm dawn tihna a ni a; engtikawng mahin khawsak ngaihna a awm lovang. Kum 4 chhungin lirthei ziah luh thar 118,147 a awm a; lirthei awm zawng zawng atanga chhutin lirthei punbelhna hi zaa 40.13% a tling a ni. Heng zingah hian lirthei ke pahnih nei (2wheeler) tam berin 200,597 a awm a, lithei awm zawng zawng atanga chhutin lirtthei ke pahnih nei hi zaa 68.13% lai a tling a ni. Hmun hma nei tha India phai ram khawpui leh ram dang khawpuiahte chuan Car changkang tak tak leh nalh tak tak, man to tak tak neihte chu an intlansiakna a ni a; kan Aizawl khawpuiah ve thung chuan lirthei ke pahnih neihah kan intlansiak lo thei lo a ni. Hei hi a chhan ber chu kan Smart City-ah hian lirthei ke pali nei tan chet chhuah ngaihna awm loh vang a ni ber. Tlang ramah awmin kan khawpui hi zim hle mah se, ruahman khawpui (planned city) tal lo ni se’ng chuan tun ai hi chuan kan ziawm zawk ngei ang.
TRAFFIC JAM LOH DAN TUR
Aizawl khawpui chhunga traffic jam tam lutuk sut kian nan AMC, Transport Department leh traffic police-te’n an zãwl tãwk theuhah theihtawp chhuahin hma an la thin a; mahse, kan zãwl khawpui hi hmun rem lo tak a nih bakah ruahman fel loh khawpui (unplanned city) a nih avangin kawtthler mumal leh felfai awmze nei taka enkawla hman hleih theih loh a nih avangin traffic jam a tam phah hle a. Lirthei intlanchhawk, Lirthei hunna, lirthei dahna in, lirthei tlan dan tur leh thildang chihrang hrang hmangin traffic jam tihziaawm dan kalpui mek a ni chungin a sãwt êm êm lem lo tih kan hre tlãng ãwm e. Heng ruahmanna tha tak takte hi kalpui chhunzawm zel chungin traffic jam tihziaawm nana hmanraw tha tak pakhat MVI leh Traffic police-te’n tangruala lirthei document an enfiah thin hi hun tiam leh bituk hranpa awm lovin kum tluanin a khat tawkin lirthei finfiah thut thutna (surprise checking) hi nei thin se traffic jam tihziaawm nan leh traffic jam free city siam nana hmanraw tha ber niin a hriat theih.
A TLÃNGKAWMNA
Aizawl khawpuia Traffic jam tam chhan dangleh chu AMC-in a sutkian ngai chi a ni. Chungte chu: 1) Bazar huam chhung (shopping mall) kawngpui kama dãwr neitute’n an lirthei nileng lenga an hun thin vang; leh 2) AMC-in chhunah ni leng lenga kawngpui kama lirthhei hun an phal vangte a ni.
Heng harsatna lian tak pahnihte hi AMC vanga awm a ni thei; chuvangin, Aizawl khawpuia traffic jam tam lutuk tiziawm tur chuan Ngaizel-Bawngkawn inkar kawngpui kama dawr neitute’n anmahni lirthei nileng lenga an hunga AMC-a parking fee an chhun thin hi AMC hian thlahlel lovin titawp tawh se, anmahni garage theuhah an lirthei dahtir vek se, dãwr hawn dawnah inthlahtirin tlai dãwr khãr dawnah inlamtirleh mai thin se; chutiang zelin Parking place ni lem si lova kawngpui kama nileng lenga lirthei hung thinte pawh hi anmahni garage theuhah dahtir mai se tun ai hian traffic jam hi a ziawm ngei ang. Zãn lam lirthei tlem veleh kawngpui kama lirthei hun an khap a; chhun eng lirthei veivak tam veleh lirthei hun an phalleh lawi si a ni. Central mi pawimawh entir nan: Prime Minister emaw President lokal changin Aizawl khawpui lailia lirthei tamna hmun leh kawngpui tlang dungte an thian fai vek tthei si a; an haw veleha kan inhnawh tãwt leh tlat site hi enge a awmzia le? Chuvangin, Aizawl khawpuia Traffic jam chhan lian tak pahnihte hi AMC vang liau liau a nih hmel a; chuvangin, AMC hian Parking fee ringawt hi hisap lovin Aizawl khawpui tãwt lutuk leh Traffic jam tam lutuk hi tihtak zeta ngaihtuahin a sutkian dan tur a ranglama ngaihttuahin a takin thawk zui se’ng chuan tun ai hian Aizawlah hian Traffic jam a tlem zawk ngei ang.
Tin, hei baka Traffic Jam tihziaawmna tha tak pakhat dangleh chu MVI leh Traffic police tangkawpa lirthei document strict taka check fo thin hi a ni. Mizo kristian inkhãwm taima em emte zingah hian lirthei document heng-insurance, Air pollution, road tax, driving license etc. felfai thlapa nei reng hi kan vang hle aniang, lirthei document MVI & Traffic police te’n an check uluk lai apiangin Zãwl khawpuiah lirthei tlãn a thãwl duak thin a, traffic jam a awm ngai lo tih theih hial a ni. Chuvangin, MVI & Traffic Police-te hian Joint Inspection hi kum tluan hian nei thin se, sorkar sum hnãr (revenue income) tha tak a nih rualin ‘traffic jam free city’ awlsam taka neih dan tha ber niin a lang.