- Lalthara, IAS (Rtd)
BJP hian MNF hi tun inthlanah hian an tlin zawh an rin tawh loh vangin, an fachuam thar atan ZPM hi an rawn rimin, an thlang fel tawh niin a ngaih theih a. Hman deuha Pu Duhawma phone-call hmanga a an rawn biakna (media a leak out palh) atang leh, hman ni lawka Rahul Gandhi-an Mizoram a rawn tlawh tuma a thusawi atangte pawh khan thil chîk mite tan chuan ngaihruat theih tak a ni bawk. Hman deuha Pu Duhawman Guwahati a zuk tlawh pawh kha he thil bawhzuina a nih ngei a rinawn bawk.
Tin, tun tuma Election kan neih hma (advanced) bîk em em nachhan pawh hi party pakhat, party dangte aia hma fal nalha bial viltu/ candidate lo siam vek tawh tan chuan thatpui tur (advantage) a ni thei tlatin a lang. Kum 2018-a kan Inthan kha chuan State panga te hian a rual deuh vekin kan vote tlang a; Mizoram chuan Madhya Pradesh rualin 28-11-2018 khan kan vote a nih kha. Tun tum hi eng vanga heti tak vote hma bik nge kan nih le? Vote hi 7th Dec ah kan chhiar rual leh vek tho dawn si a. Hei hi thil mak tak a ni a; a chhan ni awm lo ngaihtuah ve mah teh u!
Tin, ZPM leader Pu Duhawma leh an hruaitu dangte hian BJP Hindutva policy te, UCC leh Forest Conservation Amendment Act te hi Zofate tana an hlauhawmzia te hi an sawi ri duh ve ngai lova; BJP sawrkar hnuaia Manipura kan unaute nasa taka sawisak leh, an in halsak an nih dan te, Biak In 400 deuh thaw hal leh tihchhiat a nih tawh thu te thleng hian an sawi ri ngai lova. ‘Sawhthing kan lei ang’ tih leh ‘kan ei ru ve lovang’ tih te hi an campaign auh hla thunawn chu an ni mai awm e !
BJP lam lah hian thawhpui an tum tawh loh nia lang, MNF hi an rawn bei tan mêk a: ‘MNF sawrkarin SEDP an hman dan kan rawn chhui dawn’ tia BJP National President meuhin a sawi te; hman ni lawka Income Tax Deptt in Kamrula in an rawn dap dan atang te khan a chhuizawn theih vek awm e. Chutih laiin, ZPM hi chu an beiin, an sawichhe ve duh miah lo!
Tin, ZPM official newspaper anga mipuiin an ngaih thup, Vanglaini ah hian article chhuah tur hi an duhtui hle in, BJP sawiselna lam hi chu hmuh tur a vang khawp mai.
Chutih laiin, Vanglaini dated 30-10-23 a ‘Double Standard’ tih article, BJP thlavang hauhna ziah ni ngeia lang, Laiu Fachhai (hming lem ni awm tak) ziah an rawn chhuah duh kha a mak ka ti. A sei em avangin a tlipna thu thenkhat chauh hi han tarlang i la: “Central a roreltu eng party mahin India hi Hindu Lal Ram, Theocratic Hindu State (Country) nihtir an tum a rinawm loh” tih te, “Centrala roreltu party chuan Hindu sakhua lam a awn zawk a nih pawhin, Pathian nung betu Kristiante tan chuan hlauh tur a awm lo” tih te, “Secularism (sakhaw zalenna) hi ringtu member tipungtu leh thlarau nun tichaktu a ni hran lo” tih te, “sakhaw uzalenna pawh Mizoram leh India ramah a awm zel a rinawm” tih te a ni nawk ta mai a. Hei hian tu lam tang nge an nih a tarlang em? Hei hi BJP anti-Christian policy leh, hemi umzui nana an thil tih mek sawi nep/ sawi mawi tumna ni tlatin a lang! Tun hnaia kan Missionary te leh Christian institutions hrang hrang an beih nasatzia leh an tihmangan dan te hi an hre lo der tlat emaw tih mai tur a ni ta!
Heng tunlai thil awmzia te hi hriatna tura beng nei chuan lo hre mawlh rawh se!!