Pakistan-in an rama lehkha mumal nei lova mi chengte Nilaini hmaa chhuak tura a tih avangin Afghan sang tam takin chhuah tumin ramri an pan.
Pakistan hian November 1-ah chuan mi maktaduai 1.7 zet chu chhuak turin an ti a, a nih loh chuan man emaw, thawn chhuah emaw an ni dawn tih a sawi lawk a. Heng zinga a tam ber hi Afghan an ni.
Kum 2021-a Taliban-ten Afghanistan-a thuneihna an chan leh hnuah khan mi tam tak chuan hlauvin an ram an chhuahsan a, tam tak rei tak Pakistan-a lo inbengbel tawh an awm bawk.
Chhuak tura a tih hun hi Thawhlehni zanlaia tawp tawh zawk kha a ni nghe nghe.
Hetih lai hian Pakistani chanchinbute chuan an ram chhuahsan tuma chet la mekte chu Nilaini nileng khan an chet chhuahna hun hawnsak an nih thu an tar lang hlawm.
Nula pakhat chuan, “Pakistan chhuahsan tura min tih hian khawi nge kan pan chuan ang?” a ti.
Pakistan hmarthlang lam, Peshawar-a lehkha zir mek, Sadia-i hian kum hnih kal taa Taliban-ten Islamic dan khauh tak kengkawha hmeichhiate tan lehkha zir an phal loh hnuah Afghanistan hi a chhuahsan tih a sawi.
“Pakistan-ah hian awmin lehkha zir zawm zel ka duh a. Min um chhuak a nih chuan Afghanistan-ah chuan ka zir zawm thei dawn lo. Ka nu leh pa, ka laizawn leh ka nuta te pawh an hma hun a thim vek a ni,” tiin BBC Urdu hnenah a sawi.
Tun hnaiah ramri kâna mi beihna a tam thar avangin ram pahnih inkar hi a tha vak lo va, Islamabad chuan heng thil titu-ah hian Afghanistan-a inkhuar hel ho a puh.
Afghanistan-a Taliban sorkar erawh chuan Pakistan beitu helho tawmna nia puhna hi a pha a, lehkha pawimawh nei lo Afghan-te thawn haw tumna pawh ‘pawmawm loh’ an tih thu an sawi thung.
Thawhlehnia chhuahsan tura tih ni tawpah khan Afghanistan pan tum tam tak an inpu chhuaka, truck-ah an thawmhnaw leh bungrua nen an inphur bawr nasa hle.
Thawhtanniah khan Afghan 2,00,000 dawn chuan an ram an pan hman niin Pakistan chuan a sawi a. Thawhlehniah khan mi 20,000 velin a hun taka ramri an kân hman nan an che chhuak bawk niin an sawi.
Pakistan chhuahsantu 10-a pariat vel zel chuan an chhuak loh a nih chuan man an hlau tih an sawi niin UN chuan a tar lang.
Heng raltlan, Taliban-ten Afghanistan an lak leh hnuah tlanchhiate hian an suangtuahna leh khawsak nawm an lo beiseina chu tihtawpsak a ni leh ta rih a ni.
Hetih lai hian tun hnaia an eibar dinhmun hniam em em, Pakistan tan pawh dawh reng sen a ni lo va. July thla khan Pakistani rupee chu October, 1998 hnu lama dollar nena an inthlauhna a san ber lai a thleng hial a ni.
UN hnuaia human rights office chuan Pakistani thuneitute chu ‘mihring dikna chanvo chhiatna nasa tak’ a thlen loh nan mi um chhuah chu tawpsan turin a ngen.
“Heng um chhuah zinga tam tak hian Afghanistan an pan leh a nih chuan an dikna chanvo palzutsakna an tawng nasa thei hle dawn a ni,” tiin human rights office thupuangtu, Ravina Shamdasani chuan a sawi.
Taliban sorkar pawhin an lo intiam ang an ti hlawhtling lo va, thuneihna an chan tirah hmeichhiate lehkha zir leh hna an thawh phalsak a tiam chu ti lovin an khalsak vek.
Afghanistan-a hmeichhe naupangte chu primary school chauh an kal phalsak an ni a. Park, gym leh pool-a an kal ve pawh an phalsak lo va. Beauty salon kharin hmeichhiate chu an lu atanga an ke ler thleng khuh lo chuan pawn chhuah an phal lo bawk.
Kumin kum tirah khan Taliban sorkar hian rimawi tumna hmanruate chu a lo hal tawh bawk a, heng rimawite hian ‘rilru lama eirukna a thlen’ niin an sawi.
Afghan zaithiam, Sohail pawh Afghan khawpui, Kabul atangin ‘a kawr hak lai nen chauh’ Taliban-ten August, 2021-a an khawpui an lak zan khan a tlanchhe nghal bawk.
“Musician anga Afghanistan-a awm reng thei ka ni lo,” tiin Sohail hian a sawi a, rimawi lama tuite chu Peshawar-a intawh khawm relin an tlanchhe ta niin a sawi.