Germany a cup inelna lian DFB Pokal-ah champion lai RB Leipzig chuan second round an pel zo lova. VFL Wolfsburg lakah 1-0 in an tlawm.
Thawhlehni zanah Volkswagen Arena-ah Wolfsburg in a zawna vawi hnih champion lai Leipzig an mikhual a. First half-ah goal khungin an khingpuite an haw tir.
Leipzig hi kum 2021 khan final an khelh hnuah kum 2022 leh 2023 a champion an ni a. First half tan tir lamah Czech winger Vaclav Cerny chuan an tlarhnung chetsual remchangah a la a. Goal chance neiin Tiago Tomas ball siamsak tha chu a khung a. Hemi hnuah hian goal a khung belh lehnghal teuh.
Second half-ah Leipzig in Yussuf Poulsen chu yellow card a hmuh nawm avangin an chan a, kim lova an khelh hnuah an tan thawh leh a harsa tawh.
Second half-ah David Raum hmangin woodwork an tih per a, mahse Wolfsburg an tam zawk bakah an inven thiam avangin goal khung an thei tawh lo.
Inkhel dangah Bundesliga club pahnih inkhelah VfB Stuttgart in 1-0 in Union Berlin an hneh.
MHP Arena-ah Stuttgart tan Denis Undav chuan halftime dawnah goal a khung a. Tun season a UEFA Champions League khel Union Berlin hi inelna hrang hrangah a zawna vawi 11 an tlawmna a ni tawh.
Bundesliga club dang Borussia Monchengladbach chuan FC Heidenheim 1846 chu 3-1 in awlsam takin an hneh a. Jordan Pefok chuan minute 10 chhunga goal hnih a khung hnuah Robin Hack chuan goal dang a khung leh bawk.
Inkhel dangah Fortuna Dusseldorf in goal ruk an khung a, 6-3 a chakin Ísak Bergmann Jóhannesson chuan hattrick a siam.