United States chuan al-Qaeda hruaitu an thah tak, Osama Bin Laden-a fapa, Hamza chu a awmna chin leh a chungchang hrilh thei hnenah $ mtd 1 (£750,000) an pek tur thu an puang.
Hamza Bin Laden hi Islamist firfiak pawla an hruaitu rawn ni chho mek a ni a. Afghan-Pakistani ramri velah a awm niin an hria a. Secretary for Diplomatic Security-a Assistant Michael Evanoff chuan, “Afghan-Pakistan ramri velah a awm niin kan hria a, Iran pawh a lut thei a, Asia chhim lam laili khawiah emaw ber chuan a awm,” a ti.
Tun hnai kum eng emaw ti chhung hian audio leh video hmangin thuchah a tichhuak a, US leh khawthlang lama tangrualten a pa an thah avanga phuba lak an tum thu a sawi thin.
Kum 2011 khan US special force-te chuan a pa, Osama Bin Laden chu Pakistan-a Abbottabad-ah an that a. A pa hi September 11, 2001-a firfiakten US an beiha mi 3,000 dawn an thihnaa mawhphurtu bera ngaih a ni.
Hamza Bin Laden hi kum 30 chuang awrha upa ni tura ngaih niin kum 2 liam ta khan US chu ‘global terrorist’-ah a puang a. US state department chuan kum 2001-a US beih tuma thlawhna 4 hruai kawia New York-a World Trade Center tower sutu zinga mi, Mohammed Atta fanu nen an innei niin an sawi.
A pa an thah tuma a thattuten a in atanga a lehkha pawimawh an lak chhuah zingah Hamza hi a fapa chhuan ber, a aiawh tura a duh ber niin a lang a. Hamza hian a hun tam ber chu a nu bulah, Iran-ah hun a hmang a, hetah hian nupui pawh a nei nia hriat a ni a. Report dangah erawh Pakistan, Afghanistan leh Syria vela cheng ang pawha sawi a ni.
Kum 2001-a US an beih hnua US kaihhruai tangrualten Afghanistan-a Taliban bupui an tawn darh atang khan al-Qaeda firfiak pawl hi nasa takin an tlahniam tih a lang a. Kum 2011-a US special force commando-ten Osama an thah leh hnuah phei chuan an thawm a reh hle a, ISIS firfiak pawl an rawn lang ve thung.
Hetiang hi ni mah se firfiak hnu chhui lama thawkte chuan al-Qaeda hi an tawp mai lo va, ngaihthah chi an ni lo tih an ngaihdan a ni a. Khawthlang ram leh Middle East leh Africa khawmualpuia an thawhpui ramah te pawi khawih an la tum reng niin an ngaih a ni.