Aizawl: All India Congress Committee (AICC)-a CWC member Sonia Gandhi-in Mizoram State Assembly inthlanah Congress party-in hnehna a chan ngei theih nana duhsakna thuchah a sawi video clip chu nimin khan Rajya Sabha Dy Chairman hlui leh Congress sorkara Union Minister hlui ni bawk, Prof. PJ Kurian-a’n a tlangzarh.
Congress Bhawan-a tlangzarh inkhawmah Prof. Kurian chuan BJP hlauhawmzia sawiin, ‘One Nation, One Culture,’ ‘One Nation, One Religion,’ ‘One Nation, One Language’ kalpui an tum nasa hle tih sawiin, “Heng hi hnam tlem zawk leh a bik takin Kristian tan chuan a pawi a. Congress party chuan kan do tlat dawn a. Mizoram mai ni lo, India pumah sakhaw zalenna a awm theihna atan theihtawp kan chhuah zel dawn,” a ti.
Prof. Kurian chuan sakhaw zalenna chauh hi an ngaih pawimawh a ni lo tih sawiin, “Kan nunphung kan ngai pawimawh hle a. BJP-in parliament-a MP zawng zawng hnena an sem India Constitution Preamble-a secular leh socialist an paih hi Mizo Kristian tan a pawi a ni,” tiin, hemi avang ringawt pawh hian Mizoram leh India ramah Congress party a sorkar a ngai tih a sawi.
Gandhi-i chuan a thuchahah Mizo mipuite duhsakna a hlan a. June 30, 1986-a Mizoram an tlawh a Mizo mipuiten an lo lawm danah lawm thu a sawi thar bakah a fapa, Rahul Gandhi an lo lawm danah Mizo mipuite hnenah lawmthu a sawi.
Gandhi-i chuan Mizoramah BJP thawhpui ve ngai lo tur Congress party vote vek turin mipuite sawmin, “India ramah sakhaw zalenna a awm leh ngei theihna atan BJP leh a thawhpuite hi Mizoramah leh India ramah kan vote loh ngam an ngai a. Mizo mipui, Kristian tha takte tan Congress party a ding reng dawn a ni,” a ti bawk.