Aizawl : Election Commission of India (ECI)-in State Goods and Services Tax (SGST) khawihtu State Taxation Department a phut angin, Commissioner of State Tax, Mizoram chuan Mizoram district hrang hranga Taxation office-te Mobile squad din tur leh a ranglama hma la turin thu a pe a. Hemi bawhzui hian nimin khan Deputy Commissioner of State Tax, Serchhip Zone staff ten Thenzawl khuaa dawr lian hrang hrangah mobile checking an nei.
Mobile checking hi Vanlalruata Ralte, Asst. Commissioner of State Tax hova neih a ni a. Serchhip khaw chhungah pawh mobile checking hi neih chhoh mek a ni. Mobile checking-in a tum ber chu, MLA inthlan lo awm tur denchhena political party ten sumdawngte kaltlanga dawr bungraw hrang hrang election campaign nana an lo hman awm palh thei venna tur a ni a. Physical checking bakah hian Taxation Department official ten GST portal (GST Network) atangin Serchhip District chhunga GST hnuaia dawr in register te election dawn hnaiha tam uchuak taka bungraw chahlut thar hluai leh chhiah pe tam thar hluai an awm em tih te, online-a an chhiah pekna leh bungraw lakna atangin an en bawk a. Heta an thil hmuhchhuah hi Commissioner of State Tax, Mizoram office-ah an report anga, Commissioner of State Tax office atangin Election Commission of India (ECI) hnenah report pek leh a ni dawn a ni.