Real Madrid forward Vinicius Jr. chuan kum 2027 thleng Real Madrid tana khel turin contract a ziak.
Kum 23 mi Brazil international hian nakkumah contract a neihlai a hmang zo dawn a, kum 2018 khan Flamengo atangin kum 18 mi niin Pound maktaduai 38 in Spanish khawpui hi a pan.
Real Madrid tan hian match 235 khel tawhin goal 63 a khung tawh a, an hnena a cham chhungin trophy pakua la tawhin heng zingah hian nikum UEFA Champions League trophy pawh a tel.
Real Madrid social media kaltlangin Vinicius Jr. chuan, “Madrid tantute chibai ka buk a che u, contract ka pawtsei thei hi ka lawm tak zet a, ka duhdan ber a tak ramah a thleng.”
“Helai hmunah hian hun rei tak ka cham theih ka inbeisei a, goal tam tak khung a trophy tam tak lakbelh ka duh. In zavaia chungah min thlawpna avangin lawmthu ka sawi.” a ti.
Thawhtanni khan Vinicius hi Paris a Ballon d’Or thlannaah parukna a ni a. Khelmual pawn lamah hna a thawh that avangin Socrates Award a dawng a. Brazil a hmun rethei laiah school tam tak sa in zirna hnufualnaah chawisang tura hma a lak nasat avangin chawimawina hi a dawng.