San Antonio Spurs in tun season a Western Conference a champion thei tur zinga dah Phoenix Suns an barakhaih a, huntawp dawnah a zawna bucket vawi thum neiin 115-114 in an lehthal.
Footprint Center-ah Nilaini zinga inkhelah mikhual team Spurs hian chak tura rin hlawh zawk Suns lakah hian inkhel pumpuiah hma an hruai thei lova, chak dawna an lehthal zawk bak Suns an sang zawk char char.
Mahse second 45 la awmin Spurs tan kum 19 mi, tunhnaia NBA a rookie beiseiawm ber zinga ngaih feet 7 leh inches 4 a sang Victor Wembanyama chuan bucket pawimawh a lut a. Second 6.8-ah rim hnuai atang rebound la in point hnih dang a neih belh leh bawk.
Hemi hnu hian Suns guard Josh Okogie chuan Kevin Durant hnena ball a pek chu Spurs forward Keldon Johnson chuan a chhuhsak a, bucket nei lehin Spurs in hma an hruai a, an chak nghal ta daih a ni.
Spurs tan Johnson chuan point 27 score in Wembenyama leh Devin Vassell ten point 18 ve ve an score bawk.
Spurs coach Gregg Popovich chuan, “Tihsual kan ngah a, mahse harsatna tam tak an paltlang chungin an tlo na an lantir. An beidawn duh miah loh kha thil tha ber chu a ni a, ka chhuang hle.” tiin a naute a fak.
Spurs leh Suns te hi naktuk zing dar 7:30-ah Footprint Center-ah tho an inkhel lehnghal ang.