ZPM Working President K Sapdanga chuan BJP nen khera sorkar siamho chu an tum lo hul hual tih a sawi.
Nimina Aizawl Press Club-a thu thar thehdarhtute kawmin K Sapdanga hian Mizoram mipuiin kum nga chhunga ram roreltu tur an thlang leh dawn a, mipui tam berin ngaihdan siam fel tawhin mipuiten sorkar hmel thar hmuh an nghahhlelh chhan chu kalphung thar, mipui sorkar enchhin an duh vang niin a sawi.
ZPM working president hian MLA inthlanpui neih turah mipui tinzawn chu sorkar intawm a ni lo tih sawiin, “Jentail inawlh sorkar phei chu an tinzawn lo lehzual a. Chuvangin, house-a member kan neih zat hi eng ang pawhin laklawh palh se, BJP nen khera sorkar siamho hi chu kan tum lo hul hual tih kan sawi chiang duh,” a ti.
ZPM chu ram rorelnaa Pathian tundin intiam, eirukna laka fihlim tura intiam ngam awmchhungte hi a hlanga sorkar siam tura enchhin an duh chu tihhlawhtlin an tum tih sawiin K Sapdanga hian, “ZPM party hotute leh kan candidate-te hi a zei ber chu kan ni lo a, thawkrim ber erawh kan ni tih mipuiin min pawmin kan hria a. Hnehna erawh Pathian kuta awm a ni,” tiin, mipuiten an beisei party mal sorkar chu an vote chhuak ngei dawn pawha a lan thu a sawi bawk.
K Sapdanga chuan tun hnaia Manipur Police commando-in Zo hnahthlakte chen khawmna khawpui pakhat Moreh leh a chhehvel rikrapin inte an hal a, hmeichhiate pawh kut an thlak thar leh tawh chu an dem thu a sawi a. Mizoramah ZPM sorkar a din hnu pawka NEDA hoin Zo hnahthlak unaute an la sawisa chhunzawm zel a nih chuan ralkhat atanga kut kuangkuaha thlir ngawt an tlin loh tur thu a sawiin, “A hen tawk taka kan unaute thlavang kan hauh ve pawhin min dem bik lo turah kan ngai,” a ti.
BJP Meitei-ho sapatal vanga Zo hnahthlak unaute tawrhna rapthlak tak chu a hmuna tlawh awm taka ngaih, la tlawh lo awmchhunte chu PM Modi leh Mizoram CM Zoramthanga deuh chauh an nih thu a sawi a. Pathian leh mipuite zarah ZPM hi a lo sorkar ve hlauh a nih chuan Manipur-a Zo hnahthlak unaute hian Mizoram sorkar hotute hmel an hmuh thuai tur thu K Sapdanga hian a sawi.
ZPM working president chuan tun hnaiah mi thenkhatin dawt phuahchawpa ZPM chu Meitei BJP hnen atanga pawisa vaibelchhe 15 lai dawng tawh leh Rs. vaibelchhe 20 dang dawng leh tur ni awma thu an phuahchawpa an thehdarh chu pawi an tih thu a sawi a. He thil thleng chungchanga cyber crime-a zualkoa chhui chhuak tura an ngenna hnar a ni chu pawi an tih thu a sawi a. Nunna atana hlauhawm thei a nih avangin he thil chungchangah tawpsan mai an tum loh thu a sawi a. He thu thehdarhtu hi ngaihdam atan tal pawha chhui chhuah an duh thu a sawi.
K Sapdanga chuan tun tuma MLA inthlan turah hian kum dang ang thoin vote lei nana sum chelek tum an awm tih an hriat thu sawiin, “Sum chelek nasat zualna tura ngaih chu Aizawl khawpui chhunga bial pahnihah leh ramri hrul kual zei zeia bialahte a ni a. Sum hmanga inlei tlin tumte hian sim tawh se kan duh a, kan ngen nawn leh e,” a ti.