Manchester United tan buaina chhumpui a la kiam thei lo. Newcastle United in kum 1972 hnua a vawi hnihna atan Old Trafford-ah hnehna an chang a, Carabao Cup fourth round-ah 3-0 in an hneh.

Nilaini zana Old Trafford-ah English Football League Cup round li na khelh a ni a, sponsorship avangin Carabao Cup tia hming vuah a ni.

Season beisei pha lo tak hmang mek Manchester United chetchhiatna an belhchhah a. Kawng engkimah Newcastle United chu team inremkhawm mumal zawk leh football awmze nei a khel zawkah an tang.

Inhliam avanga first team player panga chhawr thei lo leh midfielder rinrawl Sandro Tonali an hrem avanga buai mek Magpies buaina belhchhah turin defender Matt Targett chu minute hnih hnu lekah hliam avangin lakchhuak a ngai a, Miguel Almiron chuan a thlak.

Mahse Magpies in tun dinhmunah team mumal zawk an ni tih an lantir. Minute 28-naah United in ball an hloh chu an midfielder-te dang turin an tlan let tha tawk lova. Diogo Dalot chuan substitute Miguel Almiron chu veng lo bawkin Newcastle in goal hmasa ber an khung.

Minute riat hnuah United tlarhnung bawk a pherh. Dinglam atang bawk Magpies in nawrin Lewis Hall chuan an goal hnihna a khung.

Second half-ah United an insiamtha a, Aaron Wan-Bissaka leh Sofyan Amrabat te an dahlut a, an hlauhawm sawt.

Na zawka goal an nawr theih tawh laiin Newcastle United in hun remchang an neih an chhawr a. Joe Willock chuan a ball khalh luh chu mawi takin goal-ah a khung.

United hi tunkarah vawi hnih mahni mualah 3-0 a an tlawmna a ni a. An insiamthat thuai loh chuan an chungah leh manager Erik ten Hag chungah ‘pressure’ a awm belh zel ngei ang.

Manager Eddie Howe chuan, “Player te an kheltha tak zet a, result ropui tak a nih avangin ka fak bang thei lo. Matt Targett inhliam chauh kha thil lawmawm lo a ni a, mahse inkhel tan tirah khatiang a thleng chunga an inkhel kha a fakawm tak zet a ni.” tiin a player te a fak.

United manager Erik ten Hag chuan, “Kan result a tha lo tih ka hria a, hei vanga sawisel kan ni hi thil awm a ni. Mahse kan insiamtha thei tih ka hria a, hemi hna thawk tur hian ka tha tawk. Tunah kan dinhmun a tha lova, mahse hei hi ka mawhphurhna a ni.” tiin a sawi.

Arsenal pawh

Premier League champion tum Arsenal pawhin quarter-final an lut zo lova, West Ham United lakah 3-1 in an tlawm.

London Stadium-ah Mikel Arteta pawlten player paruk thlak danglamin inkhel bul an tan a, beisei an pha lo.

Minute 16-naah corner atang Ben White chuan an lamah a ti lut a. Second half-ah Mohammed Kudus chuan an goal hnihna Nayef Aguerd ball vawrh tha atang a khung a. Jarrod Bowen chuan an goal thumna a khung leh bawk.

Gunners tan Martin Odegaard chuan huntawp dawn hun pekbelhah goal khat a khung ve a ni.

Arsenal manager Mikel Arteta chuan, “Ka tihsual a ni a, ka thiltiah ka lungawi lo viau. Kan chak loh hi ka mawhphurhna a ni.”

“Inelna hrangah hlawhtlin kan duh a, mahse tunah ka tihsual vangin Cup inelna pakhat atangin kan tla.” tiin a sawi.

Blues leh Reds

League lama che tha lo Chelsea in Blackburn Rovers an mikhual a, 2-0 in an hneh.

Stamford Bridge-ah Chelsea tan hian Benoit Badiashile leh Raheem Sterling ten goal an khung a. September thla a third round a Brighton & Hove Albion an hneh hnuah a vawikhatna atan mahni mualah hnehna an chang.

Mauricio Pochettino chuan, “Kan tan inelna pawimawh a ni tih kan pawm a ngai. Europe ah kan inel lova, chuvangin kan tan huntha a ni.” tiin a sawi.

Liverpool in AFC Bournemouth 2-1 in an hneh ve bawk a. An substitute Darwin Nunez chuan second half-ah chakna goal a khung.

Vitality Stadium-ah Reds tan Cody Gakpo chuan minute 31-naah goal a khung a. Hei hi Justin Kluivert chuan second half-ah sut mahse goal a khung hnu lawkah Liverpool in an chhang lehnghal.