Aizawl: Zobawk Group YMA, Joint YMA Zobawk, Zobawk ‘N’ leh Zobawk ‘S’ Local Council chairman te bakah YMA Sub Hqrs., Lunglei aiawhten Joint meeting an neihah, State Sports Academy, Zobawk-a football ground-a hman tur phullem (astro-turf) phurh chhuah a ni chu an duh loh thu an sawi.
Nimina Zopui Hall, Zobawka Joint Meeting chuan, State Sports Academy, Zobawk-a football ground-a hman tur phullem chu hmun danga hman atan phurh chhuah niin phurh chhuah a nih lai hian mipuiten an hre mai lo a, hriat chhuah a nih veleh phullem leh bungraw dang dahnaah kal nghalin marble chip leh rubber chip phurhchhuah tura tih chu dang hmanin, phullem erawh dan hman a nih tak loh thu an sawi.
State Sport Academy, Zobawk atana hmalakna kal mek chu National Green Tribunal Court thubuai a awm avanga phullem phah hna chawlh mek a nih laia phullem phurh chhuah a ni thut mai hi pawi an tih thu an sawi a. Tuna a hmunhma leh building dinhmunte thlirin State Sport Academy hi a thuanawp an hlauh thu an sawi.
Joint Meeting chuan astro-turf phur chhuaktute’n dah let leh se, dah let tur awm lova hmundanga hman riral hman a nih tawh pawhin, State Sport Academy, Zobawk-ah hian astro-turf tha leh rintlak phah ngei a ni ang tih intiamna lehkha pe turin sorkarah ngenna siam nise tiin, sorkar lam chhanna chu November 7, 2023 ral hmaa an dawn ngei an beisei thu an sawi bawk.