Germany a football league inchherchhuan dana a sang ber pathumna a khel 1. FC Saarbrücken chuan league sang ber a champion lai Bayern Munich an barakhaih a, 2-1 a hnehin German Cup atangin an paihchhuak.
Nilaini zanah Ludwigsparkstadion-ah Saarbrücken in Bavarians an mikhual a. Second half tawp dawn hun pek belhah Marcel Gaus chuan mualneitu tan chakna goal a khung a. “Comeback” hnehna ropui a chanpui.
Kum 2020 a champion Bayern hian DFB Pokal second round a inkhelah hian first half-ah Thomas Muller chuan goal a khung a. Hei hi halftime dawnah Saarbrücken in Patrick Sontheimer hmangin an sut.
Bayern coach Thomas Tuchel chuan top scorer Harry Kane bakah Kingsley Coman leh Jamal Musiala te a chawlh hahdamtir a. First half inkhel thunun mahse goal an khung theih loh an tuar.
Bayern veteran Muller chuan, “Kan tan result na tak a ni. Cup atang second round paltlang loh hi kan beisei loh thil a ni a, mahse Saarbruecken hi kan lawmpui tur an ni. An vanneih zan a ni deuh bawk.” tiin a sawi.
Inkhel dangah Borussia Dortmund in 1-0 in Hoffenheim an hneh a, third round a an hmun an tichiang.
Dortmund tan Westfalenstadion-ah Marco Reus chuan goal a khung.
League hmahruaitu Bayer Leverkusen in SV Sandhausen chu 5-2 in an hneh a. Exequiel Palacios, Jonathan Tah leh Adam Hlozek ten goal an khung hnuah Amine Adli chuan goal hnih a khung.