South Africa in ICC Men’s Cricket World Cup 2023 a semi-final khel tura tlin chian an hnaih tawh a. Run 190 in New Zealand lakah hnehna pawimawh an chang.
Nilaini zana Pune a inkhelah hian Proteas hi vuak hmasak tir niin over 50 chhungin run 357 an siam.
Rassie van der Dussen chuan run 133 siamin Quinton de Kock chuan tun tournament a century vawi li na a siam bawk a. An pahnih inkawp hian run 200 chuang partnership an nei a, hei hi an tan a paiwmawh.
Proteas bowler Keshav Maharaj chuan wicket li la in Marco Jansen chuan wicket thum a la a, maiden over vawi hnih vawm a wicket khat la Kagiso Rabada pawimawh bawkin New Zealand in over 35.3-ah run 167 bak an siam thei lo.
New Zealand hi a zawna vawi thum an tlawm hnuah palinaah an tla thla a. Tling tur erawhin beisei an la nei. Proteas erawhin tlin chian an nghak a ni ber tawh.
South Africa wicketkeeper Quinton de Kock chuan, “Tunhnaiah kan kheltha a, a hun taka kan che tha hi a pawimawh. Keimah bikah ka inringtawk a, inkhelh nuam ka ti hle.”
“A tir lamah an vawm tha viau a, duh anga han chet mai an ti harsa. Din ngheh tura insiamrem an ti harsa a, mahse ka huntawp a hla tawh bik lova, run a tam thei ang ber siam ka duh.” tiin a sawi.
- Nilaini inkhel result
South Africa vs New Zealand
South Africa 357/4(50 Overs)
Rassie van der Dussen 133 (118)
Quinton de Kock 114 (116)
Tim Southee 2/77 (10)
Trent Boult 1/49 (10)
New Zealand 167(35.3 Overs)
Will Young 33 (37)
Glenn Phillips 60 (50)
Keshav Maharaj 4/46 (9)
Marco Jansen 3/31 (8)