Aizawl: Mizoram Secular Alliance chuan nimin khan Aizawl Press Club-ah thu thar thehdarhtute an kawm a. Mizoramah sakhaw himna leh zalenna a awm chhunzawm zel theih nan MLA inthlanpui neih turah Congress party vote turin mipui an sawm.
Mizoram Secular Alliance Convener John Siamkunga chuan India ramah political party lian pahnih an awm a, pakhat zawk, BJP chuan Hindu lal ram din tumin a bei char char a, pakhat zawk Congress party erawh chuan sakhaw zalenna tung ding turin a bei ngar ngar thung tih sawiin, “BJP leh a thawhpui, MNF leh ZPM kan vote chuan BJP kan vote tihna a ni a, sakhaw zalenna bo mah se pawi kan tilo tihna a ni ang,” a ti.
John Siamkunga chuan kumin hian India rama state panga – Rajasthan, Madhya Pradesh, Chhatisgarh, Telangana, Mizoramah te inthlanpui neih a ni dawh a. Lok Sabha inthlan hma chuan state inthlan reng reng a awm dawn tawh lo tih a sawi a. Hindu lal ram din tumtu BJP chuan Mizoram mite ngei hmanruaa hmangin sorkarna lak tumin thapui thawhin a che tan mek a. Sum hmangin sorkarna lei a tum dawn niin a sawi.
Inthlang tur state panga zinga pathum tal la turin BJP chuan thih thain a bei mek tih sawiin John Siamkunga chuan, “BJP hian Lok Sabha rorel khawla MP a ngahna hmangin sakhaw zalenna, secularism a paih thei ang a; mahse, chumi tipuitling tur chuan state pathuma sorkarna lak belh a ngai a. Tuna a lamtang state 11 a nei mek a, pathum a neih belh chuan state 14 lamtang a nei tling ang a, a duh a tipuitling thei tawh ang,” a ti.
John Siamkunga chuan BJP leh a thil tum tha lo takte dodal a, tichhe theitu tur leh sakhaw zalenna humhim tura intiamtu Congress party candidate zawng zawng vote a tul tih a sawi a. “Congress party thlan tlin a nih chuan BJP thil tihte chu an tiboral thei dawn a. Sakhua a him theih nan hei hi chu kan tih ngei a ngai a. Chuvangin, Congress party candidate te vote pe vek turin mipuite kan sawm a ni,” a ti bawk.