Kolasib-a St John’s Higher Secondary School Auditorium chei thar chu nimin khan Kolasib Bawhsap John LT Sanga’n a hawng a, hemi rual hian ni hnih awh tur St John’s HSS inter-house cultural meet a hawng nghal.
Kolasib Bawrhsap chuan St John’s HSS-in ṭha tak leh changtlung taka Auditorium chei thara, hman theiha an peihfel ta chu a lawmpui thu a sawi a. St John’s HSS-in an kumtin dana inter-house cultural meet an buatsaih leh thei pawh lawmawm a tih thu sawiin, lehkhabu kaltlang leh classroom chhunga zirna pangngai piah lamah, zai, lam, infiamna leh co-curricular activity (CCA) hrang hrang chu zirlaite ṭhanlenna kawnga puitu, mihring puitlinga chher chhuahna hmanraw pawimawh tak a nih thu a sawi.
CCA chu zirtirtute leh zirlaite inkara inpawhna, thawhhona leh inhriatthiamtawnna ṭha zawk siamtu, zirlaite khawhawi tizautu leh zirlai zinga thiam thil bik (talent) nei te zawn chhuahna hmanrua a nih thu Kolasib Bawrhsap chuan a sawi a. Tunṭuma St John’s HSS-in cultural meet an buatsaih chuan hnam ziarang ngaihhlut leh chawinun kawngah zirlaiteah rah duhawm tak chhuah se a duh thu a sawi bawk.
St John’s HSS, Kolasib auditorium chei thar hawnna leh inter-house cultural meet hawnna inkhawm buatsaihah hian School Principal Brother Saiju P. Michael chuan inlawmna thu sawiin, report a pe a. Brother Andrew Lalbiakfela’n hunserh hmangin, auditorium thar leh cultural meet chu malsawm ṭawngṭaiin a hlan a. Bawrhsap leh Father bakah, zirtirtu leh zirlai ten khawnvar chhitna hun (lamp lighting ceremony) hmangin, hnam lam, zai leh rimawi hmanga house hrang hrang intihsiakna buatsaih zui a ni.
St John’s HSS zirlaite hi house pali – Blue House, Green House, Red House leh Yellow House-ah te an inṭhen a. Inter-House Cultural Meet-ah hian hnam lam, zai leh rimawi hmangin house hrang hrangte an inel dawn a ni.