- Lalthara, IAS (Rtd)
Tunlai hian ZPM campaigner te hian UCC hi Pu Nehru-an India PM a nih laia a duan chhuah a ni, tiin thu an thehdarh chiam mai a. Hei pawh hi Miizote zinga BJP thlavang hauh an tumna ni ngeiin a lang. An thu sawi innghahna atan hian Prof J Doungel of MZU in Seminar/ pannel discussion-a a thusawi (video recording) an rawn dah nghal bawk.
He video-a Prof J Doungela thusawi hi chu, Pu Nehru-an Hindu Code a tuipui thu leh, tun hnaia Modi an UCC a rawn tuipui ve thung thu a ni a. He thu thehdarhtute hian Hindu Code leh UCC in thil hrang daih a ni tih an hre lo nge, mipui bum nan dâwt an sawilui, tih chu hriat a ni lo.
Nehru’an a buaipui Hindu Code hi chu Hindu tan chauh a ni a, sakhaw dang zuitute a huam lo. Heng Hindu Code te hi dân (Act) ah chantirin, Nehru-a hun lai khan Parliament-in ‘The Hindu Marriage Act, 1955’ te, ‘The Hindu Succession Act, 1956 ‘ te ‘The Hindu Adoption & Maintenance Act, 1956’ etc an pass ta a ni. Heng Act te hi Hindu te tan chauh a ni a. Keini Kristiante tan chuan Indian Christian Marriage Act, 1872 kha hmanzui zel a ni. He dan (Act) ah hi chuan Kristian sakhaw puithiamte hi inneihtir theitu an ni.
Tuna Modi hnuaia BJP sawrkarin a duan mek, UCC hi chu India ram pumpuia sakhaw hrang hrang zuitute hman tlân tura ruahman a ni a, Kristian leh Muslim te pawh min huam vek dawn a ni. Inneih danah te, ro luah danah te, fa lâk danah te a tam ber Hindu ho tih dan kan zui a ngai dawn niin a lang. Hei hi a hmingah pawh ‘Uniform Civil Code’ a nihna chhan chu a ni. He UCC hi nakum India inthlanpui-a BJP an chak leh vaih chuan dân (Act)- ah siam a ni ang a; keini Kristian leh tribal te tan chuan a va ngaimawh awm dawn em! Hindu ho tih dana kan innei ve a ngaih chuan kan va buai nasa dawn em! Hei hi nakum Parliament election lo awm tura BJP tlin lohtir a pawimawhna lian tak pakhat chu a ni. Nakum inthlanpuia BJP lehthal tur hian Congress leh a thawhpuite tha kan tihchak a ngai a. Tun State Assembly election atang hian, BJP chhêmtlu thei tur thli kan tlehtir a ngai tawh a ni.