Uttarakhand state forest department chuan kum tina February 15 leh June 15 inkara an tawrh ziah thin, khaw lum leh ni sa lutuk avanga ram kang an tawrh thinah kuminah ramngaw hectare 2,000 chuang a kan tawh thu an sawi.
Uttarakhand-ah hian a ni telin khua a lum chho zel a. Ram kang hian ram hectare 2,037.77-a zau a kang tawh a, nikuma kang aiin hectare 793-in a zau tawh niin an sawi.
Forest department chuan kum tin hian February 15 leh June 15 inkarah ram kang lian tham tak hi an tawk ziah niin an sawi a. Kuminah hian hmun 295 zetah kangmei hi chhuakin ram pawh a la chak duai duai hle niin an sawi a ni.
Chief Minister Trivendra Rawat chuan video conference hmangin forest department thuneitute a sawipui tawh a, hetah hian district hrang hrang thuneitute pawh telin kangmei thelh a nih theih nan hian rang taka che zung zung turin a ti.
Chief minister hian Pauri Garhwal district-a kangmeiin rang taka ram hectare 1,000-a zau a kan chhiat hnu lawkah thuneitute hi a kawm a. He district hi kumina kangmei tuar na ber an ni mek.
Chief Minister Rawat chuan sorkar hnathawkte chu kangmei thleng ziah thinah an inbuatsaih tha tawk lo niin a sawi a, a chhan a zawt bawk a. “Kan inrinlawk miau loh chuan hetiang kan tuar hi a âwm a, sawi theih eng nge kan neih chuan ang?” tiin thuneitute hi a chhuahchhal a ni.