MLA inthlan atana inbuatsaihna kal zelah District Election Office, Hnahthial leh Block Mission Management Unit, Hnahthial RD Block (MzSRLM) tangkawp chuan Ningani khan Thingsai leh Cher- hlun-ah voter awareness campaign an nei. MLA inthlan hnuhnungbera South Tuipui biala vote tla za a 80 tlinlohna polling station ah te awareness campaign hi neih a ni.
Hnahthial District SVEEP Nodal Officer, DIPRO ni bawk K Ngosai chuan inthlan hnuhnung berah Thingsai leh Cherhlun te hian Mizoram state average voter turn-out an pha lo niin a sawi a. Kumin inthlanah chuan theihtawp lo chhuah theuh turin a chah.
South Tuipui bial chu Mizoram Assembly Constituency-ah vote tlem berna an nih thu sawiin, K Ngosai chuan an tanrual chuan vote tlak that na ber an nih theih thu a sawi a. Mipuite chu an dikna chanvo leh mawhphurhna ngaipawimawh turin a chah a. SHG nu ho pawh thawhhopuiah sawmin, ram ropui siam turin mi pakhat vote hlutna hre fo turin a chah bawk.