Indian khawpui, Delhi-a thuneitute chuan boruak bawlhhlawh lutuk avangin ni hnih chhung primary school zawng zawng khar turin a ti.
Ningani khan tun thlasik kal meka a vawi khat nan boruak bawlhhlawh lam chuan hlauhawm chin a thleng a ni.
Chawlhkar hnih lo awm leh tur chhungin tun aiin a la bawlhhlawh dawn niin scientist-te chuan an sawi lawk bawk.
Delhi environment minister chuan an khawpui boruak bawlhhlawh lutuk sawiho turin thutkhawm hmanhmawh a ko nghal a. Indian khawpui hi khawvela boruak a bawlhhlawh berna pakhat a ni.
A bikin thlasikah hian chhan hrang hrang avangin Delhi-a boruak hi a bawlhhlawh zual thin a. A chhan zingah hian lo neitute an thlai sengna ro an hal khuk te, thli thaw lo lutuk te leh sakhaw kût laia hal mawi leh hal puah hal nasat te pawh a tel.
November 1-15 inkar atang hian boruak hi a bawlhhlawh tan thin a, an thenawm state, Punjab leh Haryana-a lo neitute an lo an hal nasat tan lai a nih vang niin Delhi Pollution Control Committee chuan an zir chiannaah an tar lang.
Ningani zanah khan PM2.5 an tih, boruaka bawlhhlawh nawi awm, chuap hnawh thei leh natna chi hran hran thlen thei awm zat chuan a him chin pelin cubic metre zelah microgram 60 a awm tling a. Hei hi khawpui dai leh khawpui hmun thenkhat aiin a let sarih leh riat velin a sang zawk niin sorkarin a chhinchhiahnaah tar lan a ni.
Delhi Chief Minister Arvind Kejriwal chuan boruak bawlhhlawh leh him lo avang hian khawpuia sorkar leh mi mal enkawl primary school zawng zawng chu Zirtawpni leh Inrinnia khar turin a ti zui a ni.
Boruak bawlhhlawh zel tur tihtawp a nih theih nana kalpui, Graded Response Action Plan Phase III hnuaiah khawpui chhunga mamawh bik ngei ngei thil tih loh chu in sakna lam chi thawh khap a ni bawk.
Kar hmasa khan Phase II hmangin vantlang inkalpawhna hmanrua, Delhi metro leh electric bus service pawh huamin, hun dang zawng aia tlan tam tura tih an ni a, hei hi lirthei tlan tam tihtlema a khu chhuak a tlem theih nana ruahman a ni.
Thla hmasa khan Delhi sorkar chuan khawpui chhungah hal puah leh hal mawi zawrh, siam leh hal a khap a. He khapna ang hi tun ang hunah hian kum thum chhung lo kalpui a ni tawh.
Delhi-a chengte hian boruak bawlhhlawh an hip luh nasat avangin kum tin hriselna lama insawiselna an neih phah ziah.
Damdawi thiamte chuan boruak a bawlhhlawh zel avang hian naupang leh kum upa zingah thawhah leh chuap lama harsatna nei an pung tih an sawi.
“Bronchitis nei pawh an pung hle tih kan chhinchhiahnaah a lang a ni,” tiin Safdarjung Hospital-a medicine department-a an hotu, Jugal Kishore chuan PTI news agency a hrilh.
Thawk lama harsatna neite chu loh theih loh thil tih lovah chuan pawna chhuak lo turin a rawn bawk.