Aizawl: Mizoram State Assembly inthlanpui neih tur chu Mizo nationalism leh lal hrim hrim châknaa tuihalte inbeihna a nih thu MNF party chuan an sawi.
MNF Media & Publicity department chuan nimin khan Aizawl Press Club-ah thu thar thehdarhtute an kawm a. An General Secretary VL Krosshnehzova chuan tun tum inthlanpuia hnehna chang tura inbeihna kal chho mek chu Mizo nationalism leh lal hrim hrim châknaa tuihalte inbeihna boruak lian berah an ngaih thu sawiin, “ZPM-ten a thuam mawi nen ‘kalphung thar, mipui sorkar’ tiin sawi mawi teh tum mah se, sakhi ngalah a vun chauhin a rum a tum angin a chhunga inphum ru lian ber chu lal hrim hrim chakna avanga tuihal aw chauh niah kan ngai,” a ti.
VL Krosshnehzova chuan ZPM-ten an kalphung thar zawrh mek chu an MLA neih chhun leh independent MLA panga, dan kalha hun rei tak MLA nihna chelha bâng tate khawsak phungah a lang vek a, an intiam anga awm lo leh an insawi loh ang zela khawsa an nih avangin mipuia an inzawrhna thu tha tinrengte hi anmahni ngeiin an lo bawhchhiat tawhte a nih avangin mi nuih a tiza chho mek niin a sawi.
MNF sorkar chu a kalphung nghet, Mizo nationalism kalsan lovin, ram, hnam leh sakhua a dah pawimawh ngar ngar tih sawiin VL Krosshnehzova chuan, “A himna tiderthawng thei zawnga hmalakna awm chu a su chat a, a do ngar ngar thin. Mizo nationalism hi eng dang maha thleng a remti ngai dawn lo a ni,” VL Krosshnehzova’n a ti.
MNF Media & Publicity dept GS chuan MNF chuan hnam himna chu inpumkhat tlat a ni tih hriain Zofa hmun tina awmte huikhawm zawng leh an thlavang hauhin a pen ngat ngat a, ramri hmanga thendarha awm tawh pawh thinlunga insuihkhawm turin theihtawp a chhuah tih sawiin, Pathian leh mipuite duhsakna hmanga chakna a chang leh a nih chuan chhunzawm zel an tum thu a sawi bawk.
VL Krosshnehzova chuan MNF chuan Mizo sakhaw himna kawngah ringlo miten an thil tih theihna hmanga a nekchep zel karah pawh an rinna kalsan lovin, a dotu len leh tet thliar lova huai takin an ding nghet tlat zel tih a sawi a. Mizorama political party dangin an tih ve remchang lo, Mizo nationalism a taka kalpui ngamtu MNF candidate-te vote vek mipuite a sawm.