Hmeichhe tennis inelna WTA season kharna WTA Finals-ah tournament tha tak khel mek Jessica Pegula chuan semi-final tling chiang tawh mahse a inkhel hnuhnung berah hnehna a chang leh a, Maria Sakkari 6-3 6-2 in a hneh.
Mexico a Cancun a inkhelah hian Pegula hian set hmasa ber 5-1 a hma a hruai hnuah a la zui a, set hnihnaah game hmasa pali la in a dinhmun tha a thlah lo.
Pegula hian season kharna tournament-ah hian semi-final a khelh vawikhatna tur a ni a, kum 2018 a Sloane Stephens hnua hetiang thleng leh thei American hmeichhe hmasa ber a ni.
Semi-final a a khingpui tur erawh hriat a la ni lova, World number one Aryna Sabalenka chuan 6-2 3-5 a Elena Rybakina laka hma a hruai laiin khawchhia avangin inkhel chawlh lailawk a ni a. He inkhel a chak zawk hian semi-final an lut tawh ang.
Nizan khan group lehlamah Iga Swiatek leh Ons Jabeur an inkhel anga, Coco Gauff leh Marketa Vondrousova te inkhel bawkin an pali in tling thei vek an la ni.