Aizawl: Punjab state sorkar hnuaia education changtu minister, Harjot Singh Bain chuan Mizoramin AAP MLA a neih hun leh sorkarna an siam hunah zirna tha neih a nih theih nan theihtawp an chhuah tur thu a sawi.
Mizoram tlawha zin, Bain chuan nimin khan Aizawl Press Club-ah thu thar thehdarhtute a kawm a. AAP chuan an sorkarna state-ah te zirna leh hriselna kawngah nasa taka hma an lak thu a sawi a. Mizoramah pawh AAP MLA an neih hun leh sorkarna an siam hunah zirna tha leh hriselna kawngah nasa taka hma an lak tur thu a sawi a. Delhi leh Punjab ah chuan sorkar school an siam tha a, mi tin tan a thlawnin zirna an chhawpchhuak a, chutiang chu Mizoram hian a nei ve thei tih a sawi.
Bain chuan Lengpui a rawn thlen hnua Govt Lengpui High School a tlawh hnuah Mizoram sorkarin zirna tihchangtlun kawngah nasa taka hma a lak a tul tih a sawi bawk.
“Politics hian mi zawng zawng a nghawng a, kan fate leh kan tute thlenga nghawng a nih avangin tute pawhin politic thianghlim leh tha kan ngaihven a ngai tawh a ni,” Bain chuan a ti.