Aizawl: Sorkar laipuia Ministry of Education hnuaia NCERT bultumin PARAKH State Educational Achievement Survey (SEAS) buatsaih a ni a. Survey hi pawl 3, 6, 9 zirlaite tan buatsaih a ni a, district tina sikul thlan chhuah 1,602-ah survey hi neih a ni.
SEAS neih zawh takah hian pawl 3 zirlai 10,752, pawl 6 zirlai 11,436, pawl 9 zirlai 11,580, an vaiin zirlai 33,768 an tel a ni.
SEAS-ah hian SCERT Mizoram chu implementing agency an ni a, Samagra Shiksha Mizoram chu monitoring agency an ni a. Field Investigator (FI) atan DIET, IASE, College leh DIET atanga train chhuak tawhte hman an ni a, an vaiin mi 1,762 thlan chhuah an ni.
He survey neihna atan hian PARAKH, NCERT buatsaih naupangte zawhna questionaire chu survey neihna sikulahte hian FI-ten sikul tinah kengin, an chhan zawh thlengin sikul ah awm a. An chhanna chu lakkhawm nghal niin, khaikhawm leh a ni dawn a, hei hian Mizo zirlaite ziak leh chhiar leh chhiarkawp a an pawl mila thiamna an neih dan a tar lang dawn a ni.
PARAKH, NCERT-in a buatsaih a zawhna awmte hi zirlaiten chhan nuam an tiin an hlimpui hle nia sawi a ni a. Heng zawhnate hi PARAKH-in English-in state tinah a thawn darh a, state hrang hrangin anmahni tawngin an lo siam tha leh a, Mizoramah chuan SCERT-in Mizo tawnga lo letin survey-ah hian hman a ni a. Hetiang zawhna hi naupang tam takin an chhan vawi khatna a ni a, zirtirtute pawhin tha an tih thu an sawi bawk.
Hetiang zawhna ang hi DIKSHA Mizoram portal-ah Pawl 1 atanga Pawl 5 chhan turin dah chhuah a ni a. Hun kal zel turah zirlaiten an zirlai an thiam leh thiam loh tehchhuahna tur zawhna siam chungchangah hmasawnna a thlen beisei a ni.