Kar leh maia vote thlak tur ani ta. Inthlan campaign in a vawr tawp a thleng tawh a. Party tinin an thiam zawng zawng an chhuah zo tawh a. Campaign danah a duh tui deuh leh duh tui lo deuh an awm a. Pawisa lam sawi ri hauh lova thianghlim taka campaign an awm laiin a then chu ip puar tawk tak nen an thawkchhuak a. Vaibelchhe tel senga campaign an awm laiin pawisa seng vak lova tling pawh an awm leh ngei dawn a ni.
Party zawng zawng tih theih deuhthaw in an campaign au hlaah development an sawi a. A bik takin central lam ring an ni bawk a, bjp chuan kil tinah an tiam lian hle. Zpm lamin kalphung thar bakah power lama intodelh an sawi a. Congress lamin ram leh hnam himna bakah kut hnathawktute puihna tur tang puihna an aupui nasa hle.
Engpawhnise, kan political party te hian mipui duhzawng an zuar thin a, an zawrh sap sap tawh hi chu mipui tuihalna a lo ni ngei thin.
Development kan sawi rual hian khawvel a kaihhnawih sawi tue hi a tam hle mai. Development chu a awhawm a. Ram dangte anga kan ram hi ram nuam a siam turin engkim mai hi develop ngai a la ni a. Kawng ani emaw, eizawnna hrang hranga hmasawn kan sawi rual hian ram hmasawn tak tak, a chhunga chengte rethei tam em em si te, a ram neitute ber bet leh em em si te pawh a awm tam mai.
Development kan awh ngawih ngawih nei si hian a ram leilung fate chu development ah chuan an tel ve lo daih thei a. Tin, development hian kan ram sik leh sa a khawih chhe vek thei bawk. Chu mai a la ni lova. Mihring kan lo nih a, he khawvela kan chen chhung bak kan chatuan nunna neih turte thleng hian development hian a nghawng chhe vek thei a ni. Development hian kan sakhuana a chim ral thei a. Kan hnam hi a nuai bo thei a. Thang leh thar hun turah hian mizo tih tur an awm tawh hauh loh ai chuan hmasawn lo taka awm a, kan ramah hian zalen taka mizo nih a, kan chatuan nunna nei tura hlim taka chen tum hi a duhawm zawk ngei ang.
Hnam lian leh changkang zawkin kalkawng tha pui pui min siam sak ang a. Chu kalkawngah chuan hnamdang motor hlir an tlan sung meuh chuan kan thlah dik tak mizo tlangval chu kawngsirah tuna dumka ho in kan rama an rawn thawh ang chauh thawkin an awm ve mai mai ang tih pawh hi kan hlau tur ani ang. Ram neitu nisi vai ram airport kawngsir a kutdawh kan hmuh angte hi kan tu leh fate chan ani ve thei tih hre reng ila. Development chu mizote tan a him em? Kan sakhua atan a him em tih ngaihtuah hmasa ila a va tha em.