Kum 1980 chhova drug lord Pablo Escobar-a’n a khawi thin tuivawkte chu 166 zet an ni tawh a, Colombia chuan a suat then dawn.
Environment Minister Susana Muhamad chuan 20 an tiching dawn a, a dangte chu ram pawna thawnin ‘thenkhat’ chu tihhlum an ni dawn tih a sawi.
Mi thiamten kum eng emaw zat chu heng tuivawkte hi an pun loh nan hma an lo la tawh.
Escobar-a hian a mi mal sahuan, Hacienda Nápoles-a dah turin heng tuivawkte hi a la lut a. Kum 1993-a police-in an kah hlum hnuah khan an la awm zui ta reng a ni.
Thuneitute chuan Colombia-a an luipui ber, Magdalena-ah an tam lutuk loh nan an inthlahpun lohna turin hma an lo la nasa tawh thin a, thenkhat tichingin thenkhat chu ram pawna sahuana dah turin an thawn chhuak thin.
An pun zel lohna turin bei mah se anmahni tihlumtu tur ramsa dang an awm ve loh avang leh an chenna lai, Antioquia region-a tuihnawng tha tak chu African ramsa tana chenna hmun tha ber ang a lo nih bawk avangin an pung zel tho a ni.
Nikum khan rannung cheng dangte an beih nasat tak avangin suat tura thutlukna siamna kawng a inhawng ta a ni.
“Dan anga thawn chhuah a nih theih nan hma lak mek a ni,” tiin Muhamad-i chuan a sawi niin tual chhung chanchinbuten an tar lang.
“Ram danga an environmental authority-in phalna an pe a nih phawt loh chuan thawn chhuah kan tum chuang lo,” a ti.
Ministry hian tihremna turin an duhthlan theih hnuhnung berah tihhlum an dah bawk tih a sawi tel bawk.
Colombian mi thiamte chuan tun hma deuh atang tawhin tuivawk inthlahpung zel hi dan anih loh chuan mihring leh ramsa dang cheng vete tan hlauhawm a ni mai dawn tih an lo sawi tawh.
An chhut lawk dan chuan, hetia thlah zalen tawp chuan kum 2035-ah chuan 1,000 an tling tawh dawn a. Hetih mek lai hian ramsa humhalh duhtute chuan tihchin hi ramsa tan a hlauhawm hle a, a titu tur tan pawh hlauhawm a nih thu an sawi.
Tuivawkte hi khawmuala cheng zingah chuan ramsa lian ber pawl an ni a, a pa puitling hi tonne thum zet a ni thei a. An hlauhawm em awm bawk a, kum tin mi 500 vel tihlum ziah ang an ni.
Magdalena River-a sangha mana ei zawngte an tibuai fo tawh a, sikul pawh an bei tawh a, thi em erawh an la awm lo.
Escobar-a kha Medellín cartel hotu niin ‘cocaine king’ tia sawi thin a ni a. Miami leh United States chhim lama ruihhlo a tawlhruk atangin $ tluklehdingawn 30 zet neia ngaih a ni.
Kum 10 chuang nasa taka talin mi ruk bo, thah, tham, bomb tihpuah leh ruihhlo tawlh ve dang nena inbeihna a thlen nasa hle.
Khawvela mihring man duh ber zinga pakhat a ni thin a, kum 1991 khan Colombian sorkar nen inremna siamin ama siam, La Catedral a tihah kum nga lung in tang turin a inpe.
A hnu kum khat lekah sorkar hian tan in him zawka dah an tum laiin a tlanchhuak zui.
US pawhin a lumanah $ maktaduai 2 zet a chhiar a. December 2, 1993 khan a pianna khua, Rionegro-ah police laka tlanchhiat a tum lai chu in chung zawlah kah hlum a ni ta a ni.
A hnuhma tharum thawhna tam tak a hnutchhiat bakah hian acre 5,500 zeta zau, Hacienda Nápoles tia a hming a vuah, Antioquia-a hmun chu a kalsan a. Hetah hian tuivawk pali bakah giraffe, sanghawngsei leh zebra te pawh a dah a ni.
Hacienda hi a thih hnuah sorkarin mi rethei hnenah a pe a, a tuivawk vulhte erawh an awm zui ta reng a, an buaipui ta mek.