Pachhunga University College chuan Mizo historian leh ziak mi langsar, B.Lalthangliana hnenah ‘Laisuih Award 2023’ hlan.
PUC hian nimin khan an College Auditorium-ah kum thum dana an hman thin, Cultural Day cum Music Day an hmang a. He Day-in a ken tel, thu leh hla hmanga Mizo hnam insuihkhawmna kawnga mi thawhhlawkte hnena an pek thin, ‘Laisuih Award 2023’ chu B.Lalthangliana hnenah an hlan a ni.
Laisuih Award hian sum fai, Rs 20,000 bakah trophy leh thuziak (citation) a keng tel a. He Award hi a dawngtu B.Lalthangliana hnenah hian khuallian, PUC principal hlui Dr. Tawnenga’n a hlan.
B. Lalthangliana hi June 16, 1943 khan South Khawbung khuaah a piang a, Khawbungah hian pawl 4 thleng a zir hman a, hemi hnu hian khaw chhak lamah an pem a, zirna chu a bul atangin a tan tha leh a ni.
Kum 1975-ah Mandalay University atangin M.A (History) chu distinction-ah a pass a, kum 12 chhung zet Mandalay University-a History Department-ah a thawh hnuin kum 1986 khan Mizoramah a rawn haw leh a, Hrangbana College-ah leh Pachhunga University College-ah te lecturer hna a nghet lovin a thawk a, kum 1987 khan Hrangbana College-ah dah ngheh a ni a. Hrangbana College atang hian Associate Professor-in a pension a ni.
Kum 1961 vel atangin thu hi a ziak tan a, lehkhabu hi 64 a ziak tawh a, seminar paper 104 zet a ziak tawh bawk. A lehkhabu te hi Mizo tawng, Kawl tawng leh Sap tawng tea ziak a ni hlawm a. A lehkhabu tam ber hi Mizo history leh culture lam a ni ber a, literature lam lehkhabu pawh thahnem tak a ziak bawk.
A lehkhabu ziah zinga hriat hlawh zualte chu – History of Mizo in Burma, Ka Lungkham, Mizo Nun Hlui Part I & II , History of Mizo Literature, Pi Pu Chhuahtlang, India, Burma & Bangladesh-a Mizo Chanchin leh Zoram Encyclopedia te an ni. A lehkhabu ziah pahnih – ‘Ka Lungkham’ (1989) tih leh ‘History of Mizo Literature’ (1993)-te hi MAL Book of The Year atan thlan a ni tawh a, ‘Ka Lungkham’ tih phei chu MAL Book of The Year hmasa ber a ni nghe nghe.
Laisuih Award hi mi pathumin an dawng tawh a. V. Thangzama, Lalnunmawia (Valtea) Lalnunsanga hnenah hlan a lo ni tawh a ni.