MPCC President Lalsawta kaihhruai Congress party chu sorkar hnathawkte puala tihhlawhtlin tur policy nei awmchhun party an nih thu MPCC thupuangtu Dr Lallianchhunga’n a sawi.
Champhai South bial-a Indian National Congress (INC) Official Candidate Dr. Lallianchhunga’n Champhai South bial chhung hmun hrang hrang atanga Congress party zawm thar te tlawhchhuahna hun a hmanah thu sawiin, kumin MLA inthlanpuiah Pathian leh mipui zara an sorkar chuan, National Pension Scheme (NPS) hmangtu sorkar hnathawk zawng zawngte chu Old Pension Scheme )OPS) ah an let vek dawn niin a sawi.
Dr Lallianchhunga chuan, NPS hmangtu hi Mizoram pumah sorkar hnathawk mi sing dawn an awm tawh a, an pawisa thawh do let nana sorkarin a senso zat pawh kumtin Rs nuai 4500 a tling tep tawh tih sawiin, “Hei hi kum tina pung tur a ni a. NPS atanga OPS a let leh hi thil tih theih ngei nia kan hriat avangin, tuna Mizoram sorkarin sum leh paia harsatna a tawh mek chhawk zangkhai nan pawh OPS hi kalpui ngei tulin kan hria,” a ti.
Sorkar laipui pawhin NPS a kalpui mek chu a khua leh tui te that tlanna ber tura ennawn turin Union Finance Secretary kaihhruaina hnuaiah April 6, 2023 khan Committee a din tawh a. Sorkar laipui hnuaiah pawh hian OPS-ah an let leh vek lo ang tih a sawi theih loh tih sawiin, “Kum 2003 a advertisement chhuah hmanga kum 2004 a sorkar hnathawk an lak te pawh Old Pension Scheme an hman tir leh mek tawh bawk,” a ti bawk.
MPCC thupuangtu chuan, Congress party an sorkar chuan SSA hnuaia thawktute harsatna chinfel an tum dawn bawk tih a sawi a. Hei hi an party hotute pawhin an ngaipawhmawh hle a. Vawi leh khatah an zavaia an dah nghet thei lo a nih pawhin a tahtawlin an dah nghet ang tih an tiam thu a sawi.