Hachhek Congress Joint Block chuan thuchhuah siamin, Hachhek biala Indian National Congress (INC) candidate Lalrindika Ralte chu Hachhek MNF Joint Block-in thu belhchian dawllo hmangin tihhming hliau an tum nasat thu an tar lang.
An thuchhuahah, November 1, 2023-a Hachhek MNF Joint Block thuchhuahah, Lalrindika Ralte-in MLA fund a hman danah Rs. 50,00,000 beneficiary mumal awm loa hman ral nia an tar lan chu, thu belhchian dawllo a nih thu an tar lang a. Hemi atan hian MNF party President leh Chief Minister ni bawk, Zoramthanga ngeiin December 9, 2022 khan MLA Fund hman phalna a pe a. Phalna a hmuh angin kuhva hralh theihloh avanga chhungkaw harsa 3000 chuang hnenah tanpuina pawisa chu pek a nih thu leh, Beneficiary list pawh hi DC Office-ah thehluh a nih thu tar langin, “Hetianga dawngtu mumal awmlo anga sawi hi politics inchirhthehna mai a ni,” an ti.
Hachhek bialtu MLA-in a fund hmanga buhfai a lei, Rs.15-in a hralh nia an sawi pawh thu belhchian dawl lo a nih thu tar langin, “Heng buhfai te hi Covid avanga chhungkaw harsate hnenah a thlawn ngeia sem a ni a. SEDP ang mai maia a dawngtu tur khawi party emaw a inpek ve kher ngailo in a mamawh a piang MNF mi leh sa te pawh pek an ni. A dawngtu list pawh DC Office ah kimchang taka theh luh a ni,” an ti bawk.
Thuchhuah chuan, kuhva chingtute hnena tanpuina pawisa pek hi GPC meeting minute bawhzuia Planning Department in MLA Fund Guideline an siam that hnuin, January 18, 2023 atang khan phal a ni a. Hemi hnu hian chhungkaw tam tak kuhva huan enkawlna atan tanpui an ni tawh a. An hming pawh chiang taka theh luh niin an dawng ngei bawk, tiin, Hachhek Congress Joint Block chuan bialtu MLA-in a fund a hman dan chu chhuanawm an tih thu an tar lang.