Mizorama kohhran, political party leh NGO hrang hrangten Mizoram inthlanpuia vote chhiar ni sawn turin Chief Election Commissioner hnenah ngenna an thlen nawn a, a chhanna darkar 24 chhung ngeia hmuh an beisei.
Mizoram Kohhran Hruaitute Committee (MKHC) kaihhruaiin NGO Coordination Committee, MPF leh political party aiawhte chu Ningani zan khan Synod Office-ah inhmukhawmin Mizoram inthlanpui vote chhiar hun sawn tura ngenna an thlen tawh tun thlenga chhanna an la dawn loh chungchang sawihovin, Election Commission of India hnenah ngenna thlen nawn an rel.
He thu bawhzui hian nimin khan MKHC leh pawl dang hruaitute chuan Mizoram Chief Electoral Officer chu hmuin, vote chhiar ni sawn tura ngen nawnna lehkha, Chief Election Commissioner thawn tur an pe a ni.
An lehkha thehluhah chuan ECI-in vote chhiar ni atana a ruat, December 3 chu Kristiante ni pawimawh, Pathianni a nih avanga December 4 emaw, 5 emawa sawn tura rawtna kohhran, tlawmngai pawl leh party aiawh hrang hrangten an thlen tawh thu leh tun thlenga chhanna pakhat tê pawh hmuh a la ni lo chu Mizoram mipuiten mak an tih thu an tar lang.
Hemi chungchangah hian November 2 zan-a joint meeting chuan inthlan vote chhiar ni atana December 3 ruat chu pawm thei lovin ECI-ah ngaihhtuah tha leh a, December 4 emaw 5 emawa sawn tura ngen leh nise tia thu an rel thu leh an ngenna lehkhathawn chu darkar 24 chhung ngeia chhanna hmuh an beisei thute an tar lang bawk.
October 9, 2023-a Election Commission-in state pali assembly inthlan hun a puan khan vote chhiar ni hi a rual vek, December 3 ni turin a ruat a, he ni hi Pathianni a nih avangin Mizoram political party pariat leh pawl hrang hrangten a huhoin vote chhiar ni hi sawn turin an lo ngen tawh a, MKHC leh MPF pawhin vote chhiar ni sawn tur leh Pathianni leh Inrinni ni lo ni dang ruat turin an lo ngen tawh a, hetihlai hian tun thlengin ngenna hi ECI-in a la chhang lo a ni.
Hetihlai hian Election Commission hian Rajasthan aţanga ngenna an dawn angin Hindu hunpui, ‘Dev Uthani Ekadashi’ nia vote thlak hun tura ruat sawn a remti a. Rajasthan-a vote thlak ni tura ruat, November 23-ah hian nupa tuak tam tak innei tura ruahman a nih avangin an ngenna angin November 25 a vote thlak zawk turin a ti a ni.