Election Commission of India hnenah Mizoram assembly inthlana vote chhiar ni a ruat chawlhni chu sawn turin ngen fo tawh mah se chhanna a la awm mai loh avangin MKHC leh political party ten a vawi thum nan vote chhiar ni sawn turin ngenna an thlen leh.
Mizoram Kohhran Hruaitute Committee, political party panga – MNF, Congress, ZPM, BJP leh AAP hruaitute, MPF leh NGO Coordination Vommittee hruaitute chuan a huhoin nimin chawhma khan Mizoram Chief Electoral Officer Madhup Vyas chu a pisaah an kawm a, vote chhiar ni sawn tura ECI hnena ngenna lehkha an siam chu an theh lut.
Hemi chungchanga chanchinbu thenkhat zawhna chhangin MKHC Joint Secretary Lalnilawma Kawlni chuan MKHC-in vote chhiar ni sawn turin vawi hnih ngenna ECI-ah an thehluh tawh thu sawiin, tun thlenga chhanna an la hmuh loh avangin a vawi thum nan ngenna an thlen nawn leh a, political party pangate pawhin a hran theuha lehkha siamin vote chhiar ni sawn tur hian ngenna lehkha an theh lut bawk tih a sawi.
Lalnilawma Kawlni chuan CEO Mizoram nen an inkawm chungchang sawi bawkin, “Kan inkawmnaah hian kan lawm tlang viau a, CEO hian kan lehkha thehluh hi vawiinah emaw, naktukah emaw thehluh ran an tum thu min hrilh a, ‘recommend pawh strong takin kan la ziak ang’ tiin min thlah,” a ti.
Vote chhiar ni sawn tura an ngenna chu tihhlawhtlin ni lo ta se engtiangin nge hma an lak chhunzawm ang tih zawhna chu chhangin MKHC Joint Secreatry Pu Lalnilawma Kawlni chuan, MKHC-in tum thum lai ngenna lehkha an thehlut tawh a, hei bak chu MKHC ang chuan han tih chhunzawm vak ngaihna an hriat tawh loh thu a sawi a, an kal zel dan tur chu NGO emaw political party te kutah an dah deuh tawh thu a sawi.
Tar lan tawh thin angin ECI-in October 9, 2023-a state pali assembly inthlan hun a puan khan vote chhiar ni hi a rual vek, December 3 turin a ruat a, he ni hi Pathianni a nih avangin Mizoram political party leh pawl hrang hrangten a mal leh a huho ten vote chhiar ni hi Inrinni leh chawlhni ni lo, ni danga sawn turin ECI-ah ngenna an lo thlen tawh thin a, vote thlak a ni tawh hnuah pawh ECI chuan vote chhiar ni sawn tura ngenna hi a la chhang lo.