Bahujan Samaj Party (BSP) chuan Rajasthan leh Madhya Pradesh assembly inthlan lo awm tura party mala chuh an tum ang bawkin nakuma Lok Sabha inthlan lo awm turah pawh mahnia chuh an hreh lo va, Congress nena thawhho an tum hran lo tih an party chief Mayawati chuan nimin khan a sawi.
“Congress hian kan duh ang tawk seat min pe thei dawn lo a nih chuan BSP hian a malin kan chuh mai ang,” a ti.
Mayawati hi nimin khan an party dintu, Kanshi Ram-a thihcham puala Bahujan Prerna Kendra, New Delhi-a an party-in hun an buatsaihah thu sawiin an elpui party-ten tactic leh pressure siam reng mah se chungte chu thuneihna an channa hmanrua tur a nih zawk thu a sawi.
“BSP-in kan thawhpui tur chu kan phu tawk seat min pe thei tur an nih a ngai a. Congress hruaitute hian Bharatiya Janata Party ang maiin BSP hi thuneihna chan nan lek hman min tum a nih chuan kan hnawl ang,” a ti a ni.
An party worker-te hnenah Mayawati chuan an elpui party-te chuan BSP chak lohna tur thil hrang hrang an ti reng dawn tih sawiin, “Mahse, kan party hi harsatna tam tak paltlang tawh kan ni tih hriar reng tur a ni,” a ti bawk.