UEFA Champions League Group D-ah Inter Milan in huntawp dawn lamah penalty hmu in chakna goal an khung a, 1-0 a FC Salzburg hnehin knockout stage khel turin an tling.
Austria a Red Bull Arena Salzburg-ah Inter in huntawp dawnah handball atangin penalty an hmu a. Substitute striker Lautaro Martinez chuan goal-ah a khung.
Martinez hian goal a khung hma in goal bar a pet per a, Davide Frattesi leh Alessandro Bastoni te pawhin goal an khung teuh.
Spanish club Real Sociedad pawh knockout stage atan an tling chiang tawh a. Portuguese club Benfica lakah 3-1 a chakin an tum ram an thleng.
Reale Arena-ah La Real hian first half minute 21 chhungin goal thum an khung a. Mikel Merino, Mikel Oyarzabal leh Ander Barrenetxea ten goal an khung.
Second half-ah Benfica tan Rafa Silva chuan tun season Champions League a an goal hmasa ber a khung a, mahse khung belh thei lovin an khingpuite an chungnung zawk tluan.
Goal khungtu Mikel Merino chuan, “Kan fans ten nasa takin min tiphur thin a, kan inkhelhdan avangin an lawm a, an tan engkim hlan hi kan duh thin.”
“First half-ah 3-0 a kan sang zawk khan min pui nasa a, mahse second half-ah kha aia tam khung thei kan ni a, goal kan chhuah hnuah erawh kan buai zui lo.” tiin a sawi.