Aizawl : Pachhunga University College (PUC) in village adoption an kalpuiah, Khawrihnim an zirchian leh kawng hrang hranga an lo enkawl thin chu nimin khan Government High School, Khawrihnim kawtzawlah a kharna hun an hmang.
September 24, 2023 khan PUC-in Khawrihnim hi a adopt a. Hemi hun chhung hian he college zirtirtute’n kawng hrang hrangin Khawrihnim hi zirchiangin, chu an zirchianna a bua chhuah turin an buatsaih mek a. An thil hmuhchhuah tlangpui chu Mizo tawng a siamin, he adoption kharna inkhawmah hian vice principal Dr Margaret Z Khiangte-in a tlangzarh nghal.
PUC hian Khawrihnim an zirchian bakah, he khuaa zirlai ti tha palite PUC-ah direct admission pek an ni a. Khawrihnim khua HSLC leh HSSLC titha berte hnenah award pek an ni.
Khawrihnima Government High School, Middle School leh MUP te tan zirna kaihhnawih a zin harhna (exposure tour) an buatsaih a; PUC-a academic department hrang hrang leh NSS unit te pawhin he khua hi tlawhin an khawtlang tana tangkai tura an ngaih kawng hrang hrangin hma an va la thin a ni.
Heng bakah YMA, MUP, MHIP leh Middle School te hnenah thilpek an pe bawk.
Khawrihnim adoption kharna inkhawmah, he school headmaster Upa C Ngurthantluanga, Khawrihnim YMA president Ramhmangaiha, Khawrihnim MUP president R Lalbiakthanga leh PUC principal Prof H Lalthanzara ten thu an sawi.
He inkhawmah hian Khawrihnim YMA leh MHIP te pawhin PUC hnenah thilpek an hlan bawk.
PUC hian kum 2012 atangin village adoption programme hi an lo kalpui tawh a, Phulpui, Lungleng, Dulte leh Khawrihnim te an lo adopt tawh a ni.
He village adoption programme atan hian PUC zirtirtute chuan pawisa an inthawhkhawm thin a ni.