North East Students’ Organisation (NESO) ruahmanna angin Mizo Zirlai Pawl (MZP) chuan nimin khan Vanapa Hall kawtah Manipur buaina chin fel ngiatin punkhawm an buatsaih.
He huna thusawitu, MZP President H. Lalthianghlima chuan Manipur tual chhung buainain ziaawm lam a la pan thei lo chu pawi an tih takzet thu sawiin, buaina chin fel thuai a nih theih nan sorkar laipuiin hmala se an duh a, ral thlir mai mai lo turin an phut tihte, India hotu lu, prime minister ngei pawh a hmunah kalin buaina ching fel turin hma la se an duh tih a sawi a, Mizoramin sorkar thar a neih veleh chief minister tharin rang takin hma la se, a hmun pawh tlawh ngei se an duh tih a sawi.
Lalthianghlima chuan MZP-in Manipur-a remna tluantling a awm theih nan hma an lak dawn thu leh tih tur awm apiang an tih dawn thu a sawi bakah zirlai pungkhawmte pawh an hmalak zelna tura ngaihtuahna fim hmanga MZP-te tawiawm zel turin a sawm a ni.
He hunah hian NESO Vice Chariman Ricky Lalbiakmawia pawhin thu sawiin Manipur buaina hian a daih rei ta hle a, central sorkarin chin fel tum lova a thlir liam mai mai hi NESO-in an dem takzet tih a sawi a, tan bik neia an hmalakna titawp turin leh buaina tireh thuai tura an duh avangin hian India hmarchhak state zawng zawngah punkhawm an buatsaih tih a sawi bawk a ni.