Ningania North East Students Organisation (NESO) ruahman anga MZP-in Manipur tual chhung buaina chungchang ching fel thuai tura central sorkar an phutna, Vanapa Hall Kawta an nei hi an thlawp thu MNF chuan an sawi.
An thuchhuahah MNF chuan, Zo hnahthlak unaute tawrhna nasa tak kara rum mekte harsatna a rang thei ang bera chinfel thuai an duh tak zet tih an tar lang.
MNF chuan Zo hnahthlak unaute chenna in tam tak leh Kristiante Biak In tam tak halralin a awm a, nunna chan leh hliam nasa tak tuar tam tak an awm bawk a. Hetiang thil thleng rapthlak tak kara Central sorkar a ngawi tlat mai chu hriatthiam har an tiin, tan lam bik nei lo va, thu lai tak la a, harsatna tawk mekte harsatna chingfeltu ni ngei turin NESO-in central sorkar a phutna an thlawp thu an tar lang a ni.