Aizawl: Election Commission of India (ECI) thupek angin vawiin hian Aizawl South III huam chhunga awm, Muallungthu Polling Station-ah vote thlak that a ni dawn.
November 7, 2023 khan Mizoram State Assembly inthlanpui atana vote thlak a ni a. Vote thlak zawk tuka inthlan buaipuitu polling officer-ten thil pawimawh hrang hrangte an endiknaah November 8, 2023 khan district hrang hrangah General Observer, RO leh ARO-ten an nei a, he hunah hian political party/candidate aiawhte pawh an tel.
Uluk taka post poll scrutiny neih a nih hnuah Aizawl South III huam chhunga Muallungthu Polling Station-ah vote thlak hmaa neih hmasak thin, EVM hmanga vote thlak chhinna ‘mock poll’ neihnaa vote tlate dan anga paih fel hmasa phawt lovin mipui vote thlak kalpui a ni tih hriat a ni.
Hemi chungchangah hian inrawnkhawmna neih a nih hnuah bialtu Returning Officer (RO) chuan observer nen inrawnin inthlan that neih rawtna chu ECI-ah a thlen a. ECI chuan sub-Section (2) of Section 58 of the Representation of the People Act, 1951 tlawhchhanin Muallungthu Polling Station-a vote thlak chu a cancel a ni.
ECI chuan RO atanga rawtna lut chu ngun taka a ngaihtuah hnuah vote thlak that neih rem tiin, a hun atan November 10, 2023 (Zirtawpni) zing dar 7 atanga tlai dar 4 chu a rawn ruatfel nghal a ni.
ECI thupek angin Mulluangthu Polling Station-ah vote thlak that a nih dawn avangin Election Department chuan nimin vek khan hemi huam chhunga cheng mipuite, candidate leh political party-te chu inthlan that nei tura lo inruahman turin a chah a. Inthlanna muanawm, felfai, dik leh langtlang neih a nih theih nana thawhpuiah a sawm nghal.
Muallungthu Polling Station-a inthlan buaipui tur hian polling party hran hlak District Election Officer (DEO), Aizawl chuan a ruat a. Ningani chawhnu dar 3 khan an duty-na tur hmun panin DC Office, Aizawl an chhuahsan a, chawhnu dar 3:40 khan an duty-na tur hmun polling sttion, Muallungthu Community Hall an thleng fel a ni.
Muallungthu Polling Station-ah hian vote nei mipa 536 leh hmeichhia 548, an vaiin mi 1,084 an awm a ni.
Vote thlakna turah chawlh
Zirtawpnia vote thlak thatna tur Muallungthu polling station huam chhungah Mizoram sorkarin sorkar chawlh a puang.
Ningani khan Commissioner & Secretary, General Administration Department chuan hriattirna ti chhuakin, Mizoram State Assembly inthlanpui neiha vote thlak that (re-poll) ngai awm chhun, Aizawl South III biala Muallungthu polling station huam chhunga sorkar hnathawkte bakah, state undertaking hnuaia hnathawkte, zirna in leh bank hnathawkten vote an thlak vek theih nan public holiday a puang a ni.
END-in Vote thlakna turah dry day puang
Excise & Narcotics department pawhin nimin khan hriattirna tichhuakin, vote thlak thatna tur huam chhungah dry day a puang.
Nimina hriattirna tihchhuahah, ECI thupek angin END pawhin Rule 5 of the Mizoram Luquor (Prohibition) Rules, 2022 in thuneihna a pek tlawhchhanin November 9, 2023 tlai dar 4 atanga vote thlak that ni, November 10, 2023 tlai dar 4 thleng Aizawl South III bial huam chhungah zu khap burna dry day puan a nih thu a chhuah a. Hemi hun chhung hian sipai canteen huam telin zu zawrh, hralh chhuah leh in khap a nih thu a chhuah a ni.