Aizawl: Manipur-a Zofa pawl hrang hrang khaikhawmtu, Zo United hruaitute leh Mizoram NGO Coordination Committee hruaitute chu nimin khan Central YMA Committee room-ah an inkawm a, Manipur tual chhung buaina chhuak avangin Zohnahthlak mi 151-in nunna an chân tawh tih tar lan a ni.
He an inkawmhona hi NGO Coordination Committee Chairman Lalhmachhuana, Central YMA president chuan kaihhruaiin Manipur-a cheng Zohnahthlakte tawrhna chu a tawp mai dawn lova a lan avangin kawng engkimah fei a ngaih thu sawiin, Zo United hruaitute chu tei rei peiha pawl kaihruai turin a fuih a, Mizoram mipuiten theihtawpin kawng engkimah tanpui zel an huam thu a sawi bawk a ni.
He huna Zo United hruaituten an tar lan danin May 3-a buaina a chhuah tan atanga tun thlenga Meitei-ten Zohnahthlakte chenna khua an halsak chu 302 a tling tawh a, chenna in 8,166 hal ral a ni tawh a. Chenna in halsakte awm lailawkna tur, relief camp 200 siam a ni tawh a. Chenna in nei lova awm tawh chi chu mi sing nga chuang an ni tawh a, buaina avanga nunna chân hi mi 151 an tling tawh a, relief camp-a awm mi 42 laiin nunna an chân tawh bawk a ni.
Zo United hruaitute hi Manipur atangin Aizawlah zinin Nilaini zan khan Suspension of Operation Group leh Manipur-a Zohnahthlak MLA-ten thutkhawm an nei tawh bawk a ni.