Jammu & Kashmir, Samba district ramri-a India leh Pakistan sipai inkahnaah BSF sipai, Lalfamkima (50), Durtlang chu kahhlum a ni.
BSF-te sawi danin Ramgarh sector-ah hian Nilaini zan khan Pakistan Ranger-ten nasa takin silai an hmet puak a, India sipaite pawhin chhang let vein 148 Bn. BSF Head Constable Lalfamkima chuan silai mu tawngin, hliam a tuar a, Army Hospital, Satwarim, Jammu-ah lak nghal a ni a, nimin zing dar 2:30 vel khan a hliam tuar lovin a boral a ni.
Nimin vek khan a ruang hi postmortem a ni a, vawiinah thlawhnain a ruang hi Aizawl thlenpui beisei a ni.
Lalfamkima hi Phuaibuang, Saitual district khua a ni a, a nupui, Lalzarliani nen fa pathum, hmeichhia pahnih leh mipa pakhat neiin Durtlang, Aizawlah hun eng emaw chen an khawsa tawh a, a ruang hi Durtlang North-ah vui tur a ni ang.
Nimin zing khan Phuaibuang atangin an chhungte leh a thian tha mi eng emaw zat chuan Lalfamkima ruang hmuak tur hian Phuaibuang atangin Aizawl an rawn pan a ni.