Aizawl : Aizawl Smart City Ltd-in traffic enkawlna felfai leh tha zawk a awm theihna’na traffic signal light hmanga lirthei tlan dan enkawlna – Adaptive Traffic Control System (ATCS) chu chawlhkar thar Thawhtanni atang khian Aizawl khawpui hmun hnihah enchhin a ni dawn.
Aizawl district Traffic Sr. SP chuan nimin khan ATCS, traffic signal light (a sen, a eng leh a hring) hmanga lirthei tlan dan enkawlna tura Bazar Bungkawn leh Bawngkawn, Sairang pengahte mipuite zirtirna leh enchhinna chu chawhma dar 11 atanga chawhnu dar 3 thleng neih thin a ni dawn tih a sawi.
He enchhinna hi tluang taka kalpui a nih theih nan leh traffic signal light hi Aizawl khawpuiah engtiang chiaha hman tur nge hriat a nih theih nan lirthei khalhtute chu traffic signal light awmzia lo hre thar tur leh Traffic Police duty-te thu ngaichang turin a chah a. Enchhin laia signal light zawmlote chu MV Act hnuaiah hrem theih an nih tur thu a sawi bawk.
Aizawl district Traffic SP chuan, traffic signal light chu a sen (red) a nih chuan lirthei tlan laite chu din tur a ni. Kawngpui vang tan zawnga rawng vara rin; STOP tih inziahna ah din tan tur a nih thu te, signal light a eng (yellow) a nih chuan tlan mai thei tura lo inring a, lirthei te tihnun tur a nih bakah, signal light hring (green) a nih chuan tlan tur a nih thute a sawi.