Inthlan hun a lo thleng a. Vote kan han zawng tak taka, khawpui atanga vote leina tur tuizem, silpouline tam tawk tak thingtlang lama, patling ram hmangaihtu inti ten kan han phur liam vu vu mai kha chuan rilru a va khawih em. Tlangval rualin hnatlang meuh ko in silpouline sem hna an han thawk a. Party hotu mawl zawkte hmangin tuizem.dawng tur hming kan han lam tir a. A semtu in kut an han bengin mipui kan han bawl vel kha chu hmuh a hrehawm takzet a ni.
Ram hruaitu ni mek leh nih tuma beitute hmlakna hian kan ramah hian kan biak Pathian duh dan hi kan kalpui em le? Mipuite hi kan hotute hian an hmangaih a, tui dahkhawlna tur tuizem an pe duh anih pawhin inthlan dawna pek kher hi hriatthiam a har a. A lo thlirtute erawhin a petu chhungril nun kan hmu fiah thung a. Buh lak hun a ni a. Buh han senghawina leh mamawh chi hrang hrang atana hman tur silpouline an mamawh a. Mahse, inthlan dawn loah pawh an mamawh reng a. Kan pek hum hian kan rilru in a tum a tilang chiang thin. Hei hi kan biak Pathian duh dan ani ang em? Kristian kan ni a. Kan Pathian pawhin midangte tanpui tur pawhin zirtirna min pe. Mahse, a let leh beisei a midangte tanpui turin min zirtir lova. Kan theih ang tawka mite tana malsawmna ni tur bakin min hrilh lo. Mite tanpui ula, an lakah beisei let nei rawh u a ti hauh lo. Midangte tanpuina a, an laka malsawmna let beisei hi Pathian duh dan kalh tlat zawk a ni.
Ring lo mi kan tih, milem pathian betuten ram inthlannaah sem theih chitin reng semin vote an zawng a. Tiam chitin an tiam a. Anni chu an pathianin a khap lem lo ani hmel a. Keini kristian inti ten ringlo mi tihdan kan han ti ve hi chu inngaihtuah chian a va ngai em. Mahni inthiam chawp nan midang pawhin an ti ve tho alawm kan ti ani thei. Hei hlei hlei hi rilru dik lo chu a ni. Midangin an lo ti anih pawha ti ve lo ngam ram hruaitu kan va mamawh em.
Kum 2023 inthlan chu khati khan kan hmang liam a. Hawh u, inngaihtuah chiang ila. Kumina kan tih hi chu duh tawk tawhin a lehpekah chuan tupawhin hetiang thil bawlhhlawh hi sim i tum ang u. Mipuite leh political party te pawhin heti ringawta min en a, thil sema min tihlawm tumtute hi hre reng ila. Kriatian ram inrelbawlna lak ata hi paihbo i tum ang u. Chu chu Lalpa duh dan leh zirtirna ani tih i hre bawk ila.