Mizoram State Assembly inthlanna atana EVM-a vote tla zat chu zaa 80.66 a ni.
November 7, 2023 khan member 40 awmna Mizoram State Assembly inthlanpui atan vote thlak a ni a. Aizawl South III bial chhunga Muallungthu Polling Station-a vote thlakah thil felhlel a awm avangin November 8, 2023 khan vote thlak that niin, he’ng zawng zawngte nena te nena Mizoram puma vote tla zat chu 6,87,334 a ni.
Mizoram puma vote nei zat 8,52,088 atangin mi 6,87,334 in vote an thlak a, hei hi vote nei zawng zawng atanga zaa 80.66 a ni a. Mipa vote nei 4,13,062 atangin mi 3,30,627 (zaa 80.04) in vote an thlak a, hmeichhia vote nei zawng zawng 4,39,026 atangin mi 3,55,707 (zaa 81.25) in vote an thlak bawk.
Hetih lai hian, kum upa leh pianphunga rualbanlo zinga mahni in lama vote thlak (home voting) leh inthlan kaihhnawiha duty turte’n facilitatiton centre-a an vote thlak leh service voter atanga vote tla te chhiar tel a la ni lo a. Hei hi hriat kim a nih hunah Mizoram pumpuia vote tla zat chu tun ai hian a la sang thei a ni.
Mizoram State Assembly inthlanpuia district mal khaiah assembly bial pathum awmna Serchhip chu vote tlak that berna a ni a, zaa 84.78 a tla a. Assembly bial pathum awmna Mamit-ah zaa 84.65 a tla a, assembly bial pakhat awmna Hnahthial-ah zaa 84.19 a tla a, Lunglei-ah assembly bial paruk awmin zaa 83.68, assembly bial pathum awmna Kolasib-ah 82.95, assembly bial pakhat awmna Khawzawl-ah 82.40, Saitual-ah constituency pathum awmin zaa 80.80 a tla a, assembly constituency pathum awmna Lawngtlai district-ah zaa 80.58 tlain, Champhai district chhunga bial pathum awmah zaa 79.92 a tla a, bial 12 awmna Aizawl district-ah zaa 77.83 leh vote tlak chhiat berna, Siaha district-a bial pahnih awmnah vote zaa 77.03 a tla thung.