Aizawl: Bank of India chuan Mizorama an branch pathumna turin, Zirtawpni kalta khan Bawngkawna Lalzarliani building-ah Aizawl branch thar an hawng.
Kumar Singh, General Manager, NBG (East) chuan ribbon chep chatin branch thar hi a hawng a. Bank of India, Guwahati Zonal Manager leh Deputy Zonal Manager ten branch thar hawnna hi an rawn tel pui bawk.
Bank of India hi September 7, 1906 atanga hawn tan ani a, kum 1969-ah nationalised bank-ah hlan kai a ni. Tunah hian branch 5,000 chuang nei mekin, continent pangaah branch leh representative office an nei a. Foreign branch 47 an nei mek a. Nationalised bank zingah ATM nei hmasa ber an ni.
Mizoramah kum 2011 atangin an rawn inhawng tan a, tunah hian Zarkawt leh Venghlui, Pi Pangi pengah branch an nei mek.
Bank hawnna inkhawmah Manoj Kumar Singh, General Manager, NBG (East) chuan thusawiin, Bank of India chuan Mizo mipuite tan theihtawp chhuah an inhuam thu a sawi a, Mizorama thawktute pawh tual chhung mi vek an nih tawh thu leh Mizo mipuite tan dawr a awlsam tawh thu a sawi.
Bank of India chuan Mizoramah branch tam zawk an hawn tur thu a sawi a. Bank of India chu nationalised bank a nih angin mipui huap zo tak leh mi tin banphak bank a nih thu a sawi bawk.