November 9, 2023 atanga Synod Executive Committee chu a vawi 303 nan thukhawm tan a ni a. Vawiin hian thutkhawm hi neih zawh a ni ang.
Synod Executive Committee thutkhawmah hian thupui ngaihtuah tur (agenda) 107 chhawpchhuah a ni.
Committee hrang hrang atanga ngaihtuah tur ho tur (agenda) lut zingah Synod Higher Secondary Principal tur thlan leh P.C. Girls Headmistress ruat chungchang te, inkhawm tihtlem chungchang zirchianna te, Synod Pay Commission hmalakna te, PRESCOM Department en thatna te, Synod Pension Dan 2014 en that rawtna te, Synfo Inkaihhruaina enthatna te, Pathian biak inkhawm kalhmang zir chianna te a tel.
Presbytery atangin agenda eng emaw zat a lut bawk a. Chu’ng zingah chuan Kohhran Pavalai Pawl inkhawm hun inang tlanga neih rawtna te, Kristian Hla bu-a hlate audio-a daha YouTube-a dah rawtna te, Mizorama Ministry hrang hrangte zir chiana thawh ho dan kawng zawn thu te, Synod Prison Ministry tihchangtlun rawtna te, Synod Archives tihchangtlun rawtna te, Central KTP hmalakna pakhat, YRC a puitlin thuai theih nan Synod-in hmalakpui tura rawtna te a tel a ni.
SEC thutkhawm hi Synod Moderator Rev. Dr. C. Chawnghmingliana’n a kaihruai a. Synod Secretary Upa B. Lalhmunliana’n report a pekah Manipur buaina avanga harsatna tawkte tanpui nan pawisa fai, Rs. 94,20,000 pek a nih thu te, he buaina avanga Relief Camp-a awm mekte tana bungbel Rs. 5,00,000 man leisak tura rel a nih thu te, silhfen leh mut bu bial hrang hrang panga atanga dawn khawm chu November 3, 2023 khan Churachandpur phurh thlen a nih thute a tar lang.
Ruahmanna hmasaah chuan SEC thut khawm hi November 7-9, 2023 chhunga neih tur a ni a. Mizoram MLA General Election nen a innan tak avangin thut khawm hun hi sawn tlai hret a ni.