Tata SK 612 LPS Pro Fight title fight neih zawh a ni a. Zirtawpni leh Inrinni zanah weight hrang hranga champion te zawn a nih bakah WBC India title inchuhna pathum a thleng.

Inrinni zanah Khuangthing boxer Vanlalawmpuia’n a khingpui Gugan Kumar chu round hnihnaah technical knockout in a hneh a. WBC India Super Lightweight champion thar a ni.

Round hnihnaah hnek na leh ngampa zawk Awpa’n a ding lamin a hnek tlu a, a thawh leh hnuah umin a ding lamin a vai tlu leh a, second 11 a la awm tihin referee Ajay Salvi chuan a titawp.

Awp-a hi professional huanga vawi sarih a chakna niin knockout hmanga hnehna a chan tum ngana a ni.

Inhnek hmuhnawm takah NT Lalbiakkima’n a khingpuiVanlalenkawltira chu split decision in a hneh ve bawk.

Biakkima’n rang taka a hnek zawn thin chhawrin boxer hmasawn tak Enkawlna a hneh hram a. Pro Fight chanchin a tum ruk champion thei hmasa ber a ni.

Biakkima chak mahse kum 20 mi Enkawla hmaah inhnek a thunun rei thei bik lo va, Champhai Dinthar boxer-in ruahmanna a siam fuh tawk lo va, nawr let lovin a hnek let zauh zauh a, a hnek fuh langsar mahse a hnek chhuak tam tawk lo.

Round linaah a nawr let thei tih lantirin chiang taka a hnek fuh bakah nalh takin a dawm bawk a, mahse scorecard ah a chan ti tha turin a siamtha thei tawh lo.

Biakkima hi professional boxing-a a chak vawi rukna a ni a, knockout ni lo point hmanga a chak hmasak ber a ni ve thung.

Kum 28 mi HC Lalramamfela’n kum kal ta title fight-a a tlawmna chhang letin C Lalhruaitluanga lakah hnehna a sual chhuak a. Kum riat hnuah a champion leh.

2015 khan bantamweight title a hnek chhuak a, a kum lehah a humhim zo lo. Lightweight-ah insawnin kum 2022 title fight-ah Vanlalawmpuia a hneh lo va, kuminah hriam zawkin a kir leh tih a nemnghet a, a vawi hnih nan a champion rualin Pro Fight weight hrang pahniha champion thei zingah a tel nghal.

Title Fight a a inlan hmasak berah Hruaia’n champion kawnghren hnaih viau mahse a tir round hnihah a inveng nasa deuh a, an chan a chhiat phah. Ramfela’n a tum ruk nan professional huangah hnehna a chang a, vawi hnih a tlawm tawh.

Welterweight-ah Kum 22 mi Lalruatzela’n Vanlalruatpuia chu unanimous decision a hnehin a champion.

Ruatzela’n fimkhur taka inbeihnaah hnek chhuak tam zawk a nihna a hlawkpui. A pantu zawkah ṭangin a hnuai leh chunga a hnek zawnin awmzia a neih bakah round hnuhnung berah vawi thum hnek fuh zawnin a langsar zawk.

Professional huangah vawi thum a inlanna niin a chak hmasak ber a ni a, a vawikhatna atan Pro Fight champion a ni bawk.

Zirtawpni zanah India champion pahnih

WBC Super Bantamweight title fight-ah F. Zoramchhana’n Adil Rajesh Kumar Singh chu unanimous decision in a hneh a. WBC India super bantamweight champion kawnghren a hreng.

Kum 24 mi Zotea hi Pro Fight title fight-ah 2017 aṭanga 2022 chhungin vawi thum a tlawm zawn a, WBA Asia title chuh tawhin a chak zo lo bawk.

Title Fight-a ṭum nga a inlannaah hlawhtlinna a sual chhuak a, professional boxing-a vawi ruk a chakna ni nghalin ṭum thum a tlawm tawh.

Kum 24 mi Pradish chuan round riat tlu lova a khelh tluan hnuah a lawm hle tih a sawi a, professional-ah ṭum kua chak tawhin a vawi nga nan a tlawm a, Mizo mipuiin boxing an ngainat avangin nuam a ti hle.

WBC India Bantamweight title inchuhnaah Tuipui boxer Laldingliana’n round khatnaah Pradish A chu technical knockout in a hneh.

Kum 24 mi Dinga’n vawi hnih a hnek tluk hnuah tho leh mah se vawi sarih hnek fuh zawnin lehlam a talbuai zo vek a, referee Ajay Salvi chuan round khat a zawh hma lawkin a titawp.

Tuipui tlangval hian November 26-ah WBC Asia title chuh a tum a, inbuatsaihna ṭha tak a ni tih sawiin, professional a luhchilh aṭangin boxrec-a a inhnek chhinchhiah tawh vawi liah a chak vek a, knockout-a a chak tum thumna a ni.

Pro Fight bantamweight title inchuhnaah tun tum inelna a boxer hmuhnawm ber tih ngam Lunglei Ramthar boxer Laldinsanga’n Ramdinthara lakah unanimous decision in hnehna a chang.

2022 best boxer Dinsanga’n derthawng takin inlehthalna a pumpelh hram a, a beisei tihlawhtlingin Pro Fight weight hrang pahnihah a champion.

Nikumah a bitum apiang knockout vekin flyweight title a la a, Pro Fight a khelh tawh vawi riatah chak vekin, professional a luhchilh aṭangin vawi ruk a chak zawnna a ni tel.

Middleweight title fight-ah C. Lalhruaitluanga’n F. Lalthanliana Junior lakah unanimous decision in hnehna a chang ve bawk.

Kum 2022 welterweight champion kum 25 mi Hruaia’n a vawi hnih nan title a hnek chhuak a, Pro Fight weight hrang pahniha champion thei zingah a hming a nem kai. Professional boxing ṭum sarih a khelhna niin a chak vek.

• TATA SK 612 LPS PRO FIGHT TITLE FIGHT
  @ LPS Arena, Falkland Veng

November 10, 2023 (Zirtawpni) : Bout 4

MIDDLEWEIGHT
C Lalhruaitluanga (Chawngtlai) bt F Lalthanliana Junior (Lunglei Electric Veng)
= Unanimous Decision (40-36, 40-36, 40-36)

SUPER BANTAMWEIGHT (WBC INDIA TITLE)
F Zoramchhana (Cherhlun) bt Adil Rajesh Kumar Singh (Mumbai)
= Unanimous Decision (80-72, 80-72, 80-72)

BANTAMWEIGHT (WBC INDIA TILE)
Laldingliana (Tuipui) bt Pradish A (Chennai)
= Technical Knockout (Round 1, 2:53 min)

BANTAMWEIGHT – Round 4
Laldinsanga (Lunglei Ramthar) bt Ramdinthara (Pangzawl)
= Unanimous Decision (38-37, 39-36, 40-35)

GIG Motors Fighter of the Night (Rs 3,000)

• Laldinsanga (Lunglei Ramthar)

November 11, 2023 (Inrinni) : Bout 4

WELTERWEIGHT
Lalruatzela Hauzel (Mission Veng) bt Vanlalruatpuia (Saikhamakawn)
= Unanimous Decision (39-37, 39-37, 40-36)

LIGHTWEIGHT
HC Lalramfela (Chawngtlai) bt C Lalhruaitluanga (Cherhlun)
= Split Decision (37-38, 39-37, 39-37)

WBC INDIA SUPER LIGHTWEIGHT CHAMPIONSHIP
Vanlalawmpuia (Khuangthing) bt Gugan Kumar (Chennai)
= Technical Knockout (Round 2, 2:49 min)

FLYWEIGHT
NT Lalbiakkima (Siaha) bt Vanlalenkawltira (Champhai Dinthar)
= Split Decision (39-37, 39-37, 37-39)

GIG Motors Fighter of the Night (Rs 3,000)

• NT Lalbiakkima (Siaha)

BEST BOXER (Ather Electric Scooter)

• Laldinsanga (Lunglei Ramthar, bantamweight champion)

KT ENTERPRISE PROMISING BOXER (trophy + Rs 10,000)

• Vanlalenkawltira (Champhai Dinthar, flyweight finalist)

KT ENTERPRISE BEST CHALLENGER (trophy + Rs 10,000)

• Ramdinthara (Pangzawl, bantamweight finalist)

KT ENTERPRISE BEST JUDGE (trophy + Rs 7,500)

• Lalmalsawma (Hnahthial)

KT ENTERPRISE BEST REFEREE (trophy + Rs 7,500)

• Lalchhanhima Hnamte (Armed Veng South)