Uganda khawchhak lama ruah nasa tak a sur hnua lei nasa taka a minah mi 31 vel an thi.
Commissioner for Disaster Preparedness Martin Owor chuan, “Thi zat hi kan chiang thei tawh a, mi 31 an ni,” tiin a sawi.
He chhiatna hi Ningania thleng kha a ni a, Bududa district-ah niin leimin hian lui kuang a hnawh avangin a bul velah chirh a siam nasa hle a, a bul hnaia bazar thlengin a chet theih loh phah a ni.
Khuarel chhiatna a thlena buaipuitu pawla an director Nathan Tumuhamye chuan, “Khaw pali/panga vel an buai phah a, primary school pawh an khar phah a ni,” tiin a sawi.
Uganda Red Cross thupuangtu, Irene Nakasiita chuan WhatsApp-ah thlalak thawn darhin a awh zau hle tih a hmuh theih a, lui kam velah pawh ruang a awm deuh nuaih bawk a ni a. Ruang thenkhat chu balhla hnaha khuh an ni.
President Yoweri Museveni chuan, “Bududa District-ah lei nasa taka minin mi tam takin nunna an chân tih ka lo hria a, pawi ka tiin sorkar pawh a theih ang angin a che thuai dawn a ni,” tiin a sawi.
Bududa district hi Mount Elgon bulthuta lut a ni a, Uganda leh Kenya inrina lai bawr niin leimin tamna thin lai a ni.
Leiminna lai hi Kenya nena an inrina, tlangram leimin duhna lai hmun a ni a, chhiatna lian tham a lo thleng fo tawh thin.
March, 2010 pawh khan helai bawrah tho hian nasa takin lei a lo min tawh a, mi 100 bawr velin nunna an chân.
Kum 2012 pawh khân nasa takin a lo min tawh bawk a, mi tam takin nunna chanin khaw 3 a chhilh a ni.