Aizawl: Aam Aadmi Party (AAP) zirlai pawl, Chhatra Yuva Sangharsh Samiti (CYSS) chuan zirlaiten scholarship an dawn theih loh chungchangah nimin khan Mizoram chief secretary hmuh tumin a office bulah an pungkhawm a, sorkar hotuten scholarship thuai a nih tur thu an lo hrilh.
AAP zirlai pawlte chu nimin chawhma khan Mizoram Chief Secretary Dr Renu Sharma hmuh tumin an pungkhawm a, chief secretary chuan scholarship pek chungchang chu pawm a nih ngei tur thu hrilhin meeting a neihsan a, zirlaite hian sorkar hotute thukhawm chu nghakin Mizoram Scholarship Board Secrectary PL Ramliana leh Higher & Technical Educational-a Principal Secrectary Esther Lalruatkimi te chu hmu nghalin, anni chuan Mizoram chief secretary hoa Screening Committee-naah scholarship chu approval pek a nih thu zirlai pawl member-te chu an hrilh a ni.
MSB Secrectary PL Ramliana chuan anni chuan engkim an peih fel thlap tawh a, he approval hi Election Commission of India hnuaiah a lut leh ang a, vawiinah tih fel hman a nih chuan zanin emaw, naktuk velah emaw anni lam chuan an sem chhuak nghal dawn tih AAP zirlaite nen an inkawmnaah hian a sawi bawk a ni.
Hetihlai hian MZP hruaitute nimina thukhawm chuan zirlaiten tribal scholarship second installment an la dawn loh avangin Thawhlehni zing dar 9 hian MSB Office (Dawrpui Vengthar) kawtah Sit-In-Demonstration neih a rel a, he hmalakna hian awmzia a la neih loh chuan zirlaiten an chanpual scholarship an dawn vat theih nan MZP chuan a tawp thleng hmalak zel a tum.
Hemi chungchanga thuchhuah an siamah MZP chuan scholarship second installment pawisa la dawnglo hi zirlai 19,495 an awm a, Mizoram chhunga zirna in 36 atangin zirlai 5,023 bakah pawl XI leh XII zirlai 11,462 leh Mizoram pawna awm zirlai mi 3,010-in an la dawng lo tih an sawi a, scholarship second installment tur sum la tang zat chu Rs. nuai 1,787.48 a nih thu te, heng pawisa hi Mizoram sorkar kutah a luhna a rei tawh tih sawiin zirlaite hnenah pe vat turin thuneitute an ngen nawn leh tih an sawi a ni.